کۆمەڵەی پیشەسازیی نەوتی کوردستان دەڵێت پەلەمانە بۆ هەناردەکردنەوەی نەوتی کوردستان و دەشڵێت؛ "وەبەرھێنانەکانمان زیانی زۆریان بەرکەوتووە و ناچارکراوین بە داشکاندنێکی بەرچاو لە نرخی بازاڕە جیھانییەکاندا نەوت بفرۆشین
کۆمەڵەی پیشەسازیی نەوتی کوردستان (ئەپیکور) لە تۆڕی کۆمەڵایەتیی ئێکس بڵاویکردەوە: "کۆمپانیاکانی ئەندام لە ئەپیکور بۆ دەستپێکردنەوەی هەناردەی نەوت پەلەیانە و لە هەوڵەکان بۆ گفتوگۆکردن لەگەڵ بەغدا ئامادەیی تەواومان هەیە و لە ریزی پێشەوەین".
ئەپیکور باس لە زیانەکانی راگرتنی نەوتی کوردستان دەکات و رایدەگەیەنێت: "وەبەرھێنانەکانمان زیانی زۆریان بەرکەوتووە و ناچارکراوین بە داشکاندنێکی بەرچاو لە نرخی بازاڕە جیھانییەکاندا نەوت بفرۆشین" و وەکو ئاماژەی پێداوە، "نرخی جیھانی نەوت دوو ئەوەندەی ئەو نرخەیە کە لە نێوخۆ دەفرۆشرێت."
بە گوێرەی راگەیەنراوەکەی ئەپیکور کۆمپانیاکان بەھۆی راگرتنی ھەناردەی نەوتی کوردستان، "وەبەرھێنانی 400 ملیۆن دۆلاریان وەستاندووە" و دەشڵێت؛ "ئەگەر بۆریی نەوتی عێراق-تورکیا بکرێنەوە و دڵنیایی بە کۆمپانیا نێودەوڵەتییەکان لە مافە گرێبەستییەکانیان بدرێت، ئەوکات وەبەرھێنانەکان بەردەوام دەبن".
لە کۆتایی راگەیەنراوەکەی ئەپیکور هاتووە "ئامادەین رێککەوتن لەگەڵ حکومەتی عێراق و حکومەتی ھەرێمی کوردستان بکەین و دەست بە ھەناردەکردن بکەینەوە."
لە ئاداری 2023ـەوە بەهۆی بڕیاری دادگەیەکی نێوبژیوانیی نێودەوڵەتی لە پاریس، هەناردەی نەوتى هەرێمی کوردستان و کەرکووک لە رێگەی تورکیاوە راگیرا.
کۆمێنت (0)
تا ئێستا هیچ کۆمێنتێک نەکراوە.