دوای زیاتر لە 24 کاتژمێر لە راگەیاندنی پێناسی گومرگیی نوێی ترەمپ لە دژی 100 وڵاتی جیهان، لێکەوتە سیاسیی و ئابوورییەکانی بوون بە مانشێتی زۆربەی میدیاکانی جیهان و لە ناوخۆی ئەمەریکاشدا بازاڕی پشکەکان بە رادەیەک داتەپی، کە لە سەردەمی بڵاوبوونەوەی ڤایرۆسی کۆرۆناش ئەمەی بەخۆوە نەبینیبوو.
دوێنێ بازاڕی بۆرسەی "ئێس ئەند پی 500" کە پشکی 500 کۆمپانیای گەورەی ئەمەریکا نمایش دەکات، بە رێژەی 4.8٪ دابەزینی بەخۆیەوە بینی کە لە 2020ـەوە تەنگژەیەکی لەم شێوەیەی ئەزموون نەکردبوو.
هاوکات لە ئاسیا و ئەوروپاش بازاڕی پشکەکان بە خێرایی کەوتنە بەر شەپۆلی لێکەوتەکانی ئەم پێناسە گومرگییە نوێیەی ئەمەریکا و پشکی بەشێکی زۆر لە کۆمپانیاکان بە رێژەیەکی بەرچاو دابەزی.
کۆمپانیای نایکی، بەرهەمهێنەری پێڵاو و جلوبەرگی وەرزشی، کۆمپای ئەپڵ، بەرهەمهێنەری ئایفۆن و زنجیرە مارکێتەکانی تارگ لە ئەمەریکا، زیاترین دابەزینیان بەخۆوە بینی و نرخی پشکەکانیان بۆ نزیکەی 9٪ دابەزی.
ئەوە لە کاتێکدایە دۆناڵد ترەمپ لە کۆشکی سپی بە میدیاکانی راگەیاند، "بەم نزیکانە گەشانەوەی ئابووری ئەمەریکا دەبینن" و پێداگری لەسەر بڕیارەکانی کردەوە کە بەهۆیانەوە نرخی کاڵای هاوردەکراو لە بازاڕەکانی ئەمەریکا 10٪ گران بووە، بەڵام ترەمپ پێی وایە بە زیادکردنی ئەم باجانە، داهاتی فیدراڵی بەهێز دەبێت و کۆمپانیا گەورەکانی ئەمەریکا دەگەڕێنەوە وڵاتەکەیان.
سەرۆکی ئەمەریکا نایەوێ بەمە بوەستێت و نیازی هەیە پێناسە گومرگییەکانی فراوانتر بکات و دەڵێت، "باجی قورستر دەخەمە سەر کۆمپانیا چینی و ئەوروپییەکان". لە بەرامبەردا رێکخراوی ئابووریی جیهانی نیگەرانی خۆی لە بڕیارەکانی ئەمەریکا دەربڕی و رایگەیاند؛ "بەهۆی ئەو باجە نوێیانەی ئەمەریکا خستوویەتە سەر کۆمپانیا و وڵاتانی جیهان، قەبارەی ئاڵوگۆڕیی بازرگانی لە جیهان بە رێژەی 1٪ کەم دەبێتەوە".
کۆمێنت (0)
تا ئێستا هیچ کۆمێنتێک نەکراوە.