ئەمەریکا دووەم کەشتی فڕۆکەهەڵگری رەوانەی رۆژهەڵاتی ناوەراست کرد

پنتاگۆن رایگەیاند، بە فەرمانی وەزیری بەرگریی، بۆ بەهێزکردنی پێگەی ئاسمانی ئەمەریکا، دووەم کەشتیی فڕۆکەهەڵگر رەوانەی ناوچەکە دەکەین.

شان پارنەڵ، گوتەبێژی پنتاگۆن رایگەیاند، کەشتی فڕۆکەهەڵگری یو ئێس ئێس کارل وینستۆن رەوانەی رۆژهەڵاتی ناوەڕاست دەکەین، پێشتریش ئەمەریکا کەشتی فڕۆکەهەڵگری "هەری ترۆمەن"ـی لە ناوچەکە جێگیر کردبوو.

کەشتی فڕۆکەهەڵگری کارڵ وینستۆن لە زەریای هێمن جێگیر کراوە، بەڵام گوتەبێژی پنتاگۆن ئاماژەی بەوە نەکردووە چ کاتێک ئەو کەشتییە رەوانەی رۆژهەڵاتی ناوەڕاست دەکرێت.

هاوکات گوتەبێژی پنتاگۆن هۆشداری ئەوەش دەدات؛ "ئەگەر ئێران و هێزە بە وەکالەتەکانی، ببنە هۆی مەترسی و هەڕەشە بۆسەر کارمەندان و بەرژەوەندییەکانی ئەمەریکا لە ناوچەکە، ئێمە بۆ بەرگریکردن لە خەڵکەکەمان، کاردانەوەی رژدمان دەبێت".

پێشتریش وەزیری بەرگریی ئەمەریکا فەرمانی بەهێزکردنی توانای سەربازی وڵاتەکەی لە رۆژهەڵاتی ناوەڕاست دەرکردبوو و رایگەیاندبوو، "دەبێت توانا سەربازییەکانمان بە زیادکردنی فڕۆکەی جەنگی لەو ناوچەیە بەهێزتر بکەین".

رۆژنامەی واڵ ستریت جۆرناڵ لە زاری دوو بەرپرسی باڵای ئەمەریکا بڵاوی کردووەتەوە، ئامانجی ئەمەریکا لە ناردنی ئەو کەشتییانە، بەهێزکردنی هێرشەکانیانە بۆسەر حوسییەکانی یەمەن و راگرتنی ئێرانە لە هەوڵەکانی، بەڵام بە واتای هێرشێکی لەناکاو بۆ سەر خاکی ئێران نییە.

رۆژی یەکشەممەی ئەم هەفتەیە دۆناڵد ترەمپ هۆشداری دا، "ئەگەر ئێران لەبارەی بەرنامە ناوکییەکەی لەگەڵ ئەمەریکا نەگاتە رێککەوتن، بۆردومان و سزای دارایی زیاتر چاوەڕوانی دەکات"، هاوکات عەلی خامنەیی، رێبەری کۆماری ئیسلامی ئێران لە گوتاری نوێژی جەژنی رەمەزان رایگەیاند، "ئەگەر ئەمەریکا و ئیسڕائیل هێرش بکەنە سەر ئێران، کورزی کوشندەیان لێ دەوەشێنین".