ئێوارەی دوێنێ لە رێوڕەسمەکانی جەژنی رەمەزان و ئەکیتۆ لە دهۆک، کەسێک هێرشی کردە سەر هاووڵاتییان و دوو کەسی بریندار کرد، ئەنجوومەنی ئاسایشی هەرێمی کوردستان دەڵێت، کەسەکە هەڵگری بیروباوەڕی تیرۆریستیی سەر بە داعش بووە.
لە راگەیەنراوەکەی ئەنجوومەنی ئاسایشی هەرێمی کوردستاندا هاتووە؛ "لە ڕۆژی 1ـی نیسانی 2025، لە کاتێکدا کە خەلکی پارێزگای دهۆک لە ڕێوڕەسمەکانی جەژنی ڕەمەزان و جەژنی ئەکیتۆ بوون، کەسێکی هەڵگری بیروباوەڕی تیرۆریستیی سەر بە داعش بە ئامێرێکی تیژەوە لە ناوبازاڕ هێرشی کردە سەر هاووڵاتییان و دوو کەسی بریندار کرد".
روونیشی کردووەتەوە؛ "دەستبەجێ هێزەکانی سەر بە بەڕێوەبەرایەتیی ئاسایشی دهۆک، کەسی هێرشبەریان دەستگیر کرد کە خەڵکی سووریایە".
ئەنجوومەنی ئاسایشی هەرێمی کوردستان لەبارەی وردەکاریی زیاتر لەسەر رووداوەکە دەڵێت؛ "لێکۆڵینەوە لەسەر بابەتەکە بەردەوامە و لە دوای کۆتاییهاتنی، دەرەنجامەکان بۆ هاووڵاتییان و رای گشتی رادەگەیەنین".
کۆمێنت (0)
تا ئێستا هیچ کۆمێنتێک نەکراوە.