دۆناڵد ترەمپ، سەرۆکی ئەمەریکا نیازی هەیە لەمڕۆوە کۆمەڵێک باجی نوێ بخاتە سەر ئۆتۆمبێلی هاوردە و پارچە یەدەگەکانیان و هەڕەشەی ئەوەش دەکات، ئەگەر رووسیا ئاگربەست لەگەڵ ئۆکران رانەگەیەنێت، باج دەخاتە سەر ئەو وڵاتانەش نەوت لەو وڵاتە دەکڕن.
ترەمپ رۆژی 2ـی نیسان بە "رۆژی ئازادی" ناو دەبات و دەڵێت، لەم رۆژەدا کۆمەڵێک باج و پێناسی گومرگی نوێ دەخرێتە سەر ژمارەیەک کۆمپانیای بازرگانی گەورە بۆ ئەوەی کۆتایی بەم رەوتە نادادپەروەرانە بهێنرێت کە ئەم کۆمپانیایانە گرتوویانەتە بەر.
ئەمەریکا تاوەکو ئێستا باجی قورسی خستووەتە سەر کۆمەڵێک کانزای وەکو پۆڵا، ئەلەمنیۆم و ژمارەیەک کەلوپەلی دیکە کە لە کەنەدا، چین و مەکزیکەوە هەناردەی ئەم وڵاتە دەکرێن.
بەگوێرەی میدیاکانی ئەمریکا، ئەو پێناسە گومرگییەی بڕیارە ئەمڕۆ سەرۆکی ئەمەریکا واژۆی لەسەر بکات، کۆمەڵێک وڵاتی ئاسیا، ئەوروپا و ئەمەریکای باشور دەگرێتەوە کە قەبارەی هەناردەکردنیان بۆ ئەمریکا لە قەبارەی هاوردەکردنیان لەو وڵاتە زیاترە.
دۆناڵد ترەمپ بە ئاشکرا دەڵێت، پانتایی زیادکردنی باج لەسەر کاڵای هاوردە زۆر لەمەی ئێستا فراوانتر دەبێت و تەنیا بە چەند وڵات کۆتایی نایەت، بەڵام زیاتر ئەو وڵاتانە دەگرێتەوە کە ئاستی بازرگانییان لەگەڵ ئەمەریکا هاوسەنگ نییە. دواتر لە کۆنفرانسێکی رۆژنامەڤانیدا گوت؛ "ئەمە لەگەڵ هەموو وڵاتانی دیکەش دەکەم، دواتر بزانم چی دەبێت".
هاوکات هەڕەشەی ئەوەشی کرد کە ئەگەر نەتوانێت لەگەڵ پووتین لەبارەی ئاگربەستی ئۆکراینا رێکنەکەوێت، باج دەخاتە سەر ئەو وڵاتانەش کە نەوت لە رووسیا دەکڕن.
سەرۆکی ئەمەریکا بە کەناڵی ئێن بی سی وڵاتەکەی راگەیاند؛ "ئەگەر نەتوانم لەگەڵ رووسیا لەبارەی راگرتنی کوشتوکوشتار لە ئۆکراینا رێکبکەوم، کە پێموایە ئەو کوشتوبڕە خەتای رووسیایە، کۆمەڵێک باجی لاوەکی لەسەر نەوتی رووسیا دادەنێم".
بڕیارە لەمڕۆوە باج لەسەر ئۆتۆمبێل و سەرجەم هۆیەکانی گواستنەوە بە رێژەی 25٪ زیاد بکرێت و بڕیاریشە لە مانگی ئایارەوە باجی سەر یەدەگی ئۆتۆمبێل زیاد بکرێت، ئەوە لەکاتێکدایە ئەمەریکا ساڵانە نزیکەی هەشت ملیۆن ئۆتۆمبێل بە بەهای 240 ملیار دۆلار هاوردە دەکات.
کۆشکی سپی پێشتر هۆکاری زیادکردنی باج لەسەر هاوردەی کاڵا لە مەکزیک و کەنەدای بۆ ئەوە گێڕایەوە کە ئەمەریکا ئەو وڵاتانە لەم رێگەیەوە ناچار بکات رێگری لە هاتنی کۆچبەرانی نایاسایی و قاچاخی فەنتالین کە مادەیەکی هۆشبەرە، بۆ ئەمریکا بکات.
کۆمێنت (0)
تا ئێستا هیچ کۆمێنتێک نەکراوە.