دوای ئەوەی لە سەرلەبەیانی ئەمڕۆ سێشەممەوە بەهۆی دروستبوونی كێشەیەكی تەكنیكی، هاتوچۆی گەشتیاری و بازرگانی لە دەروازەی نێودەوڵەتی ئیبراهیم خەلیل راگیرابوو، خەریكە كێشەكان چارەسەر دەبن و هاتوچۆش لە دەروازە نێودەوڵەتییەكە ئاسایی دەبێتەوە.
راگەیاندنی دەروازەی نێودەوڵەتی ئیبراهیم خەلیل رایگەیاند: لەلایەن بەرپرسانی دەروازەی خابوور لە بەری توركیا ئاگاداركراوینەتەوە كە گرفتە تەكنیكییەكان بەرەو چارەسەربوون دەچن.
راشیگەیاند: ئێستا هێدی هێدی هاتن و چوونی گەشتیاری و بازرگانی لە دەروازەكە دەستی پێ كردۆتەوە.
جەختیشی كردەوە كە ئەگەر هیچ كێشەیەكی دیكەی تەكنیكی دروست نەبێتەوە، لەچەند كاتژمێری داهاتوو هاتوچۆ لە دەروازەكە بە تەواوی ئاسایی دەبێتەوە.
ئەمڕۆ سێشەممە رێكەوتی 18/3/2025 بەهۆی دروستبوونی كێشەی تەكنیكی لە سیستەمی بەشی پاسپۆرت لە دەروازەی خابوور لە بەری توركیا، هاتن و چوون لە دەروازەی نێودەوڵەتی ئیبراهیم خەلیل بۆ گەشتیاری و بازرگانی بەتەواوی داخرابوو.
کۆمێنت (0)
تا ئێستا هیچ کۆمێنتێک نەکراوە.