یاریزانێكی یانەی هەولێر لە خولی نایابی كوردستان، سزایەكی توندی بەسەردا سەپێنرا بەهۆی رووبەڕووبوونەوە لەگەڵ ئەندامێكی یانەی ئاكرێ لە یارییەكەی دوێنێی خولی نایابی كوردستاندا.
دوێنێ شەممە لە یاریگەی دووەمی فڕەنسۆ هەریری لە شاری هەولێر، یانەی هەولێر لە یاریی دواخراوی گەڕی دووەمی خولی نایابی كوردستان مێوانداری یانەی ئاكرێ كرد، یارییەكە بە گۆڵێكی بێ وەڵام بۆ بەرژەوەندی یانەی ئاكرێ كۆتایی هات.
لە دوای تەواوبوونی یارییەكە، یاریزان سەلام ئەحمەد یاریزانی یانەی هەولێر هێرشی كردە سەر راهێنەری گۆڵپارێزانی یانەی ئاكرێ و بەهۆیەوە گرژی دروست بوو.
لەبارەی رووداوەكە، لیژنەی رێككاری و سزادان لە یەكێتی تۆپی پێی كوردستان ئەمڕۆ یەكشەممە بڕیاری دا: دوای لێکۆڵینەوە و بەدواداچوون لەو رووداوەی لە دوای یاریی نێوان یانەی هەولێر و یانەی ئاکرێ لەنێوان راهێنەری گۆڵپارێزانی یانەی ئاکرێ و یاریزانێکی یانەی هەولێر رووی دا، بڕیاردرا بە :
1- راگرتنی سەلام ئەحمەد یاریزانی یانەی هەولێر لە رێكەوتی 26-1-2025 بەدواوە بۆ ماوەی یەک ساڵ لە سەرجەم خولەکانی کوردستان.
2- پێبژاردنی بە بڕی 2 ملیۆن دینار.
دوێنێ شەممە هەر دوای ڕووداوەكە، یاریزان سەلام ئەحمەد لە روونكردنەوەیەكدا رایگەیاندبوو كە هێرشكردنی بۆ سەر راهێنەری گۆڵپارێزانی یانەی ئاكرێ بەهۆی كێشەیەكی شەخسی بووە كە پێشتر لە یارییەكدا لووتی ئەوی شكاندبوو.
جەختیشی كردبووەوە كە رووداوەكە هیچ پەیوەندییەكی بە یانەی ئاكرێ و خولی نایابی كوردستانەوە نییە، بەڵكو تەنیا كێشەیەكی شەختی بووە.
وێنە: یاریزان سەلام ئەحمەد ئەو یاریزانەی سزادراوە:-
کۆمێنت (0)
تا ئێستا هیچ کۆمێنتێک نەکراوە.