لە ئاکامی هێرشی ڕێکخراوی تیرۆریستیی شەباب بۆ سەر کەنار دەریا و هۆتێلێک لە مۆگادیشۆی پایتەختی سۆماڵ، 32 کەس کوژران و 63 کەسی دیکەش برینداربوون.
پۆلیسی سۆماڵ لە ڕاگەیاندراوێکدا بڵاویکردەوە کە ئەندامانی ڕێکخراوی تیرۆریستیی شەباب هێرشیان کردووەتە سەر کەنار دەریای لیدۆ و هۆتێلی بیچ ڤیو لە مۆگادیشۆ.
لە ڕاگەیاندراوەکەدا باس لەوە کراوە کە خۆکوژێک لە کەنار دەریایەکی قەرەباڵغدا کە هاووڵاتیانی مەدەنی لێبووە خۆی تەقاندووەتەوە، چەند چەکدارێکیش چوونەتە هۆتێلێکەوە و تەقەیان بە ناو خەڵکەکەکدا کردووە.
هەروەها لە ڕاگەیاندراوەکەدا ئاماژە بەوە کراوە کە لەو هێرشەدا 32 کەس کوژراون و 63 کەسی دیکەش برینداربوون، هێزە ئەمنییەکانیش بە درێژایی شەو ڕووبەڕووی چەکدارەکان بوونەتەوە.
لە ڕاگەیاندراوەکەدا ئەوەیش خراوەتەڕوو کە هێرشەکە پشێوییەکی زۆری دروست کردووە و ژمارەیەکی زۆر بریندار گەیەندراونەتە نەخۆسخانەکان.
لەو دیمەنانەی لە تۆڕی کۆمەڵایەتییدا بڵاوکراوەتەوە ژمارەیەکی زۆر کوژراو و بریندار لە کەنار دەریا و هۆتێلەکە بەدیدەکرێت.
لەلایەکی دیکەوە بەهۆی پێویستی بریندارەکان بە خوێن، بانگەوازی بەخشینی خوێن کرا.
ڕێکخراوی تیرۆریستیی شەباب بەرپرسیارێتی هێرشەکەی گرتە ئەستۆ.
کۆمێنت (0)
تا ئێستا هیچ کۆمێنتێک نەکراوە.