هه‌ولێر... به‌ بڕی زیاتر له‌ 2 ملیار دینار پرۆژەی شەقامێكی 30 مەتری و ئاوەڕۆیەك لە دارەتوو دەست پێ دەكات

ڕۆژى دووشەممە 8ى ته‌ممووزى 2024، لەژێر چاودێریی ساسان عەونی، وەزیری شارەوانی و گەشتوگوزار و بە ئامادەبوونی ئومێد خۆشناو، پارێزگاری هەولێر و قائیمقامی بنەسڵاوە و بەڕێوەبەری گشتیی شارەوانییەکانی هەولێر و ژمارەیەکی ديكه‌ لە بەرپرسانی حکومی و حیزبی، بە گوژمەی 2 ملیار و 422 ملیۆن دینار، لەسەر بودجەی وەبەرهێنانی وەزارەتی شارەوانی و گەشتوگوزار، پرۆژەی دروستکردنی شەقامێکی 30 مەتری و ئاوەڕۆیەكی لوولەیی لە گەڕەکی ژینی دارەتووی پارێزگای هەولێر دەستی پێ کرد.
وەزیری شارەوانی و گەشتوگوزار سەبارەت بە ناوەرۆكی پرۆژەكە و گرنگییەكەی لە سنوورەكە، بۆ میدیاكان قسەی كرد و ڕایگەیاند: خۆشحاڵین ئەمڕۆ لەگەڵ پارێزگاری هەولێر لە (دارەتوو)ین بۆ دانانی بەردی بناغەی پرۆژەی دروستكردنی شەقامێكی 30 مەتری و ئاوەڕۆیەكی لوولەیی كە گەڕەكی ژین بە گوندی باغەمرە ئەفەندی بە درێژایيی سێ كیلۆمەتر دەبەستێتەوە.
ساسان عه‌ونى سەبارەت بە گوژمەی پرۆژەكە، گوتی: گوژمەی ئەو پرۆژانە ٢ ملیار و 422 ملیۆن دینارە و لەسەر بودجەی وەبەرهێنانی وەزارەتی شارەوانی و گەشتوگوزار جێبەجێ دەكرێت. گوتیشی: ئەوه‌ پرۆژەیەكی گرنگە بۆ خزمەتكردنی خەڵكی دارەتوو و گەڕەكی ژین و گوندی باغەمرە ئەفەندی. دەشڵێت: ئەو پرۆژەیە گرفتی كۆبوونەوەی ئاو لە سنوورەكە چارەسەر دەكات و هاتوچۆی هاووڵاتییانیش زیاتر و باشتر دەكات.
وەزیری شارەوانی و گەشتوگوزار دەشڵێت: حكومەتی هەرێمی كوردستان بە ڕێنوێنییە بەردەوامەكانی جەنابی سەرۆكی حكومەتی هەرێمی كوردستان ڕێزدار مەسرور بارزانی، بەردەوام دەبێت لە پێشكەشكردنی خزمەتگوزارییەكان لە هەر شار و شارۆچكەیەكی كوردستان كە پێویستیان بە خزمەتگوزاری دەبێت.
پاشان ئومێد خۆشناو، پارێزگاری هەولێر باسی لە گرنگيی پرۆژەكە بۆ سنوورەكە كرد و هەروەها سوپاسی وەزارەتی شارەوانی و گەشتوگوزاریشی كرد كە هاوكاریانن لە جێبەجێكردنی پرۆژەی خزمەتگوزاری لە سنووری شارەوانییەكانی پارێزگای هەولێر.