Erbil 11°C شەممە 02 کانونی یەکەم 07:36

ئارام سەردار: كاتێ كەمانەكەم لە باوەش دەگرم بە خۆشەویستی دەیژنم 

لە ئێستادا ژەنیار و تیپی موزیكی زۆر بەتوانا لە كوردستان بوونیان هەیە
کوردستان TV
100%

هومەرمەند (ئارام سەردار مەجید)، یەكێكە لە ژنیارە بەتواناكانی كوردستان،ئەوە لە تەمەنی (10) ساڵییەوە خۆی هاتۆتە نێو جیهانی موزیك  وەكو ژنیارێكی بەتوانای ئامێری (كەمانجە و ڤیۆلا)  ئەندامی چەندین تیپی موزیكی و ئۆركێسترای كوردستانە هەروەها وەكو ژنیار بەشداری لە چەندین كۆنسێرت لەكوردستان و دەرەوەی كوردستان كردوە ئێمە بۆ زیاتر ئاشنا بوون بەكارە هونەرییەكانی، وەكو ماڵپەڕی كوردستان تیڤی لە نزیكەوە بە چەندین پرسیار بەسەرمان كردەوە. 
*سەرەتا بابزانین چۆنە هاتییە نێو جیهانی موزیك. 
- هەر لەمنداڵییەوە حەزێكی زۆرم هەبوو بۆ موزیك هەبوو یەكەم دەسپێكی هونەریم لە چالاكی قوتابخانەكانی هەولێر بووە لە ساڵی (1987) ،ئەوكات تە مەنم (10) ساڵان بوو دەستم بە خوێندنی موزیك و ئامێری كەمان كردووە لای مامۆستا (لوقمان جوهر). ساڵی (1995) لە پەیمانگای هونەرە جوانەكانی هەولێر بەشی مۆسیقا وەرگیرام بۆ ماوەی پێنچ ساڵ ئامێری كەمانم خوێند لە هەموو ئەو چالاكیانەی لە پەیمانگای هونەرە جوانەكاندا بەشداریم تێدا كردووە، دوای دەرچوونم وەك مامۆستای پەروەدەی هونەر دامەزراوم ئێستا سەر پەشتیاری هونەریم لە چالاكی قوتابخانەكانی پەروەردەی ناوەندی هەولێر. هەر لە سەرەتای دامەزراندنی ئۆڕكێسترای كوردستان ساڵی (1997) ئەندامی ئەو تیپەم بە ئامێری (كەمان ) و (ڤیۆلا ) وە لەهەموو ئەو كۆنسێرتانەی كە لە كوردستان و دەرەوەی كوردستان ئەنجام دراوە بەشداریم تێدا كردووە وەك ووڵاتەكانی (ڕۆمانیا – بولغاریا – جۆرجیا ) بە ڕابەرایەتی مایسترۆ مامۆستا (چەتۆ نەورۆز ) ڕیكخستنی گشت كارە هونەرییەكانیش لەلایان مامۆستا (هەڤال حەمەد ) ئەنجام دەدرا هەروەها چەندین كاری هونەریم لەگەڵ  ( دەستەی مۆسیقای شەبەنگ ) كردووە كە لە (7) ژەنیار پێكهاتبووین وەك ئامێرەكانی  (كەمان – ڤیۆلا – پیانۆ – چەلۆ ) ،چەندین كۆنسێرت و مۆسیقای كلاسیك و كوردیمان پێشكەش كردووە، هەروەها بەشداری چەند كارێكی هاوبەشم ڵەگەڵ سیمفۆنیا عێراق دا كردووە وەك ژنیاری (ڤیۆلا) وە ساڵی 2008 ئەندامی تیپی موزیكی هونەرمەند (زكریا عبدالله ) بووم ئەوكات كۆنسێرتێكمان لەوڵاتی سوید لە شاری ستۆكهۆڵم بۆ ئەنجام دا،كۆنسێرتی دووەمیش لە شاری هەولێر. ئێستاش وەك ژنیاری ڤیۆلا ئەندامی (تیپی ئۆڕكێسترای كوردستان تیڤی ) یم كە تیپێكی  زۆر سەركەوتوو چالاكە لەم ماوەیەدا چەند كۆنسێرتێكی بێ وێنەمان لە مۆسێقای كوردی و جیهانی پێشكەش كردووە بەڕابەرایەتی مایسترۆ مامۆستا (سەید ئەحمەد ڕواندزی). 
*چی وای لە تۆی كرد لە نێو ئەو هەموو ئامێرە موزیكیانە،رووبكەیتە ئامێری كەمانجە؟
- هەر لە منداڵییەوە حەزو خولیام لە مۆسیقا بوو بەتایبەتی ئەگەر موزیكەكە سۆڵۆی ئامێری كەمانی تیابایە ، هەستێكی زۆر تایبەتی لام دروست دەكرد چێژێكی زۆرم لێ دەبێنی بۆیە تــاكـــو ئێستاش كاتێ ئــامــیـَـری كـــەمـــانـــــم لە ئامێزەو بە خـــۆش ویستیەوە دەیژەنـــم. 
*كێ بە مامۆستای خۆت دەزانی؟
- بێگومان زۆر ئەوانەی هەمیشە پاڵپشت و هاوكاری من بووینە سەرەتا باوكم بەڕەحمەت بێت  (سەردار مەجید ) یەكەم كەس بوو پاڵپشت و هاندەرم بووە بۆ نێو دونیای هونەر كە زۆری حەز دەكرد ببمە ژنیاری ئامێری كەمان بۆیە لە مندالێەوە منی بردە خوولی مۆسێقا  تاكو فێری مۆسیقا بم .هەروەها سوپاسی ئەو مامۆستا بەڕێزانە دەكەم لە پەیمانگەی هونەرە جوانەكانی بەشی مۆسیقا وانەی موزیكم لایان خوێندووە سودی زۆرم لێان بینی وەك مامۆستایان (فەرهەنگ غەفور، فاروق باپیر، لوقمان جوهر،ئامانج غازی، بەكر خالد،سیروان سیرینی ،كارۆخ زرار). 
*موزیك بنەمایەكی گرنگی كاری شانۆ و دراماكانە چۆن دەڕوانیتە موزیكی وێنەیی دراما كوردییەكان؟
- ئەوەندەی من سەیرم كردووە بەشێك لە دراماكان موزیكەكانیان لە ئاستێكی زۆر باش دابوونە چونكە بەشێكی زۆر لە دراما سەركەوتووەكان كە سانی ئەكادیمی لە بواری مویزك كاریان بۆ كردووە ئەمەش دەبێتە هۆكارێك كە موزیكی باش كاریگەری تەواوی هەیە لەسەر دراماكە و هەستی بینەر. 
*وەكو ژنیار بەشداری چەندین فیستڤاڵی هونەری موزیكی كردووە؟
- ئەوەی راستی بێت بەشداری لەزۆربەی ڤیستیڤاڵەكانی كوردستان بەشداریم كردووە هەروەها لەدەرەوەی ووڵاتیش ساڵی (2008) بەشداریم لەڤیستیڤاڵی (موزیك ئەنتەر ناسیۆناڵ) لە ووڵاتی نەمسا كردووە ئەوكات لە ڕێی پەخشی ڕێكلامی تایبەت دەستكرا بەوەرگرتنی ئەو موزیك ژەنە گەنجە لێهاتووەنە سەرجەم شارو شارۆچكەكانی كوردستان لە دوای تاقیكردنەوەیان تەنیا(45) ژنیار هەڵبژێردران  بە ڕابەرایەتی ماستیر دكتۆر (عبدالله جەمال سەگرمە) تیپی ئۆركستیرَِای ژێداری كوردستان دامەزرا، دوای ڕاهێنانێكی زۆری موزیك بە تایبەتی موزیكی (مۆزارت) و چەند بەرهەمێكی كوردی جیهانی سەردانی ووڵاتی نەمسامان كرد لەشاری ڤییەننا لەوێش دەست كرا بە تاقیكردنەوە و هەڵسەنگاندن  بۆ تیپە بەشداربووەكان (لە موزیك ڤراین –گۆڵدن هۆڵ) ئێمەش زۆر سەركەوتووانە بەرهەمێكی موزیك ژەنی بەناو بانگی (مۆزارت)مان پێشكەش كرد دوای ئەوە لە فیستیڤاڵەكە چەند زنجیرە كۆنسیرتێكمان لە شوێنی جیا جیا پێشكەش كرد هەروەها بەژداریمان لە وۆڕك شۆپێك كرد لەسەر دەستی چەند پسپۆڕێكی بە ناو بانگی بواری موزیك لە زانكۆی ڤییەننا كرد وە نابێ ئەوەش لەبیر بكەم كە سەرجەم ڕێكخستنی كارەكان لەلایان بەڕێز كاك (دڵشاد عوسمان) ڕیكخرا لە ووڵاتی نەمسا. 
*لە نێو جەماوەردا زیاتر گۆرانی بێژ زیاتر لە موزیك ژەن دەناسرێت هۆكارەكەی بۆ چی دەگەڕێتەوە؟
- ئەوە پەیوەندی بەكلتوری ئەو شوێنە هەیە،چونكە لەڕۆژ هەڵاتی ناوەڕاست زۆر گرنگی بە موزیك نادرێت پێچەوانەی ووڵاتانی ڕۆژئاوا ، ئەوان مێژویەكی كۆنیان هەیە لە گرنگی دان بە موزیك بوونەتە قوتابخانە بۆهەموو جیهان هەر لە منداڵیەوە موزیك ژەن دروست دەكەن بۆیە موزیك ژەنەكانیان لەسەر ئاستی جیهان بەناوبانگن و ناسراون لێرە موزیك ژەن وەك سەربازی وونە وایە، تۆ لێرە چەند كاری بە توانای موزیك بكەیت بۆ گۆرانی بێژ زیاتر گۆرانی بێژ دەناسرێت لێرە زیاتر خەڵك گوێ لە گۆرانی دەگرن كەمتر گوێ لە موزیك دەگرن. 
* وەك سەرپەشتیاری هونەری لەچالاكی قوتابخانەكان تاچەند لە نێو قوتابخانەكان ،گرنگی بەقوتابیانی بەهرەمەند دەدەن؟
- ئێمەلەچالاكی قوتابخانەكانی پەروەردەی ناوەندی هەولێر،تیپەكی موزیكیمان هەیە،كەپێكهاتووە لە (35) ژەنیاری بەتوانا سەرجەم ئەندامەكان لە قوتابیانی نێو قوتابخانەكانی شاری هەولێر پێك هاتوون، ئاستێكی زۆر باشیان هەیە لە لایەن مامۆستای  پسپۆڕ گرنگیان پێ دەدرێت بەشێوەی ئەكادیمی دەخوێنن .وە ئامێرەكانیش پێكهاتوە لە (كەمان – ڤیۆلا – چەلۆَ – كلاڕنێت – پیانۆ – ئیقاع) لەماوەی ڕابردووشدا چەند كۆنسێرتێكمان ئەنجام داوە لەمۆسیقای كوردی جیهانی لە ئایندەشدا بەرنامەی كۆنسێرتی ترمان هەیە كەبەرهەمەكان لە ئاستێكی بەرزدایە ،ئەم تیپەیە تەنها لە ڕۆژانی پشوو ڕاهێنانیان لەگەڵدا ئەنجام دەدەین،لەو بڕوایەدام لەداهاتوو ببنە ژنیاری بەتوانا. 
*وەك موزیك ژەنێك چۆن دەڕوانیتە ئاستی موزیكی كوردی؟
- ئاستی موزیكی كوردی بەگشتی لەئاستێكی زۆر  باش دایە بەهۆی بوونی ژنیاری بە تواناو ئەكادیمی لە ئێستادا،ژەنیار و تیپی موزیكی زۆر  بەتوانا لە كوردوستان  بوونیان هەیە هەروەها دروست بوونی تیپی ئۆڕكێسترا دەریدەخات، كەموزیكی كوردی لە ئاستێكی باش دایە،لەلایەكی تر بە ئەكادیمی كردنی ملیۆدیە كوردیەكان و دابا شكردنیان بەشێوەیەكی ئەكادیمی زانستی ئەمانە هەموو بوونەتە فاكتەرێكی زۆر بەهێز بۆ پێشكەوتنی موزیكی كوردی بەڵام لەهەمان كاتیشدا هەندێك كار كراوە كرچ وكاڵی زۆریان پێوە دیارە بۆیە لێرەدا دەبێت پۆلێن كردن هەبێت بۆ هەموو ئەو كارانەی كە پێشكەش دەكرێن.
هەڤپەیڤین- كامەران حاجی ئەلیاس

کولتوور و هونه‌ر گۆرانی و مۆسیقا هه‌مه‌ره‌نگ

کۆمێنت (0)

تا ئێستا هیچ کۆمێنتێک نەکراوە.

وەڵام بدەوە وەک میوان

دەتەوێت ئاگانامەکان وەربگریت؟
بمێنەوە لەگەڵ نوێترین هەواڵ و ڕووداوەکانمان.