نەقاڕی تاشە بەردەكان دەكەن و نان لە بەردی ڕەق دەردەهێنن

نەقاڕەكان ڕۆژ تا ئێوارە چەكوشێك لەنێو لەپی دەستیان دەگرن و بەوپەڕی شارەزاییەوە و نەقاڕی تاشە بەردەكان دەكەن و نان لە بەردی ڕەق دەردەهێنن و بژێوی ژیانیانی پێ پەیدا دەكەن.
سەرەڕای سەختی كارەكانیان، نەقاڕەكان ماندوونەناسانە كار دەكەن و ڕزقێكی حەڵاڵ بۆ ماڵ و منداڵیان بەدەستدەهێنن. ئەگەر تەماشایەكی شەقام و كۆڵانەكانی زۆر شوێنی شارەكانی هەرێمی كوردستان بكرێت جێدەستی نەقاڕەكان لە هەموو شوێنێكیاندا بەدی دەكرێت.
لوتفوڵڵا ئیسماعیل ( 59 ساڵ) كە سەرقاڵی كاری نەقاڕییە، دەڵێت: لە تەمەنی 18 ساڵییەوە كە 41 ساڵ دەكات خەریكی ئەم كارەم و بژێوی خۆم و خێزانەكەی لەسەر ئەم پیشەیە پەیدا دەكەم.
هەروەها ئەیوب مرادخانی (35 ساڵ)، كە كاری نەقاڕی دەكات گوتی: 15 ساڵە سەرقاڵی ئەم پیشەیەیە، باس لەوەش دەكات ئەو بەردانەی ئێستا كاریان لەسەر دەكات بەردی هەورامانە، بەردی كانە بەردەكانی گوڵپ و باخەكۆنە و گوتی: لە زووەوە بەردی هەورامان بەناوبانگە و بەردێكی جوانە. ئێمە جوان چاكیان دەكەین، سەنگینی كارەكە لای ئێمەیە، ئەم كارەمان كارێكی قورسە، كەم كەس بتوانێت بیكات، ئێمە لە كاتژمێر 7ی بەیانییەوە تا ٤ی ئێوارە كار دەكەین و چەكوشكاری دەكەین و بە پێی خواستی وەستا بەردەكان ئامادە دەكەین، یەكێی دیكە لەو بەردانەی چاكیان دەكەین بەردی گۆنیایە، كە بۆ دیواری وشكەچین بەكاردێت و هیچ شتێكی وەك چیمەنتۆ بەكارناهێندرێت بۆ دانانی.
گوتیشی: ئەگەر بەردەكان وردەكاریان زۆر بێت ڕۆژانە یەكی 7-12 بەرد چاك دەكەین، ئەگەر وردەكاریشیان زۆر نەوێت هەتا 20-25 بەرد چاك دەكەین.
پیشەی نەقاڕی وەك هەموو پیشەكانی دیكە چەندین مەترسی هەیە. وەك ئەوەی نەقاڕەكان باسی دەكەن هەندێك جار هەرەسی بەرد ڕوودەدات و كرێكار دەبێتە ژێرەوە، یاخود ئەوەی زۆرترین كات نەقاڕەكان ڕووبەڕووی دەبنەوە، لە كاتی كارەكەیاندا پارچە بەرد و زیغ دەپەڕێت و بەر ڕووخسار و چاویان دەكەوێت و زیانیان پێ دەگەیەنێت.