نەخۆشی هەوکردنی پەردەکانی مێشک لە پارێزگاکانی هەڵەبجە و سلێمانی لەنێو منداڵاندا بڵاو بووەتەوە و ڕۆژانە ژمارەیەک منداڵ بەهۆیەوە دەبرێتە نەخۆشخانەوە، تەندروستی هەڵەبجە ئاگاداری هاووڵاتییان دەکاتەوە کە لە کاتی دەرکەوتنی نیشانەکانی ئەو نەخۆشییە سەردانی دەرمانخانە و نۆرینگەکان نەکەن و دەرمانی هەوکردنیش بەکارنەهێنن.
بەڕێوەبەرایەتی گشتیی تەندروستی هەڵەبجە ڕایگەیاند: ئاگاداری هاووڵاتییانی سنووری پارێزگای هەڵەبجە و دەوروبەری دەکەین کە لە کاتی هەبوونی هەر نیشانەیەکی ئەم نەخۆشییە لە منداڵەكانیان (نەخۆشی هەوكردنی پەردەكانی مێشک)، تکایە بەهیچ جۆرێک سەردانی دەرمانخانە و نۆرینگەکان مەکەن، یاخود گەر سەردانیشتان کرد بەهیچ جۆرێک دەرمانی هەوکردن (Antibiotic) وەرمەگرن.
تەندروستی هەڵەبجە هۆکارەکەی خستووەتەڕوو، ئاماژەی بەوە داوە کە لەگەڵ وەرگرتنی چارەسەری هەوکردن ڕێگە و شێوەی دەستنیشانکردنی نەخۆشییەکە ئاسان نابێت و ناتوانین دەستنیشانی بکەین بەهۆکاری کاریگەری دەرمانی بەکارهێنراو.
بە نیشانەکانی ئەم نەخۆشییە لە منداڵانی بچووکتر لە سێ مانگ بریتین لە:-
- شیرخواردنی کەم دەبێتەوە.
- ڕشانەوە.
- بێزاری.
- تای بەرز.
- گەشکە.
- لەوانەیه پلەی گەرمی لەشی دابەزێت.
- جەستەی نەرم دەبێت واتە بێ هێز.
- شەکرەی خوێنی دادەبەزێت.
- مەڵاشووی بەرەو دەرەوە دەردەچێت.
هەروەها نیشانەکانی ئەم نەخۆشییە لە منداڵی گەورەتر لە یەک ساڵ بریتین لە:-
- ڕشانەوە و دڵتێکهەڵاتن.
- سەرئێشە.
- هەستیاریی بە ڕووناکی زیاد دەکات، واتە بە ڕووناکی بێزار دەبێت.
- تای بەرز.
- هۆشی منداڵەکە تێکدەچێت.
- بێتاقەتی و بێزاربوون.
- لەوانەیە گەشکەی لێبدات.
- ملی ڕەق دەبێت.
کۆمێنت (0)
تا ئێستا هیچ کۆمێنتێک نەکراوە.