Erbil 24°C پێنجشەممە 29 ئەیلوول 08:24

ژماره‌ی قوربانیان له‌خۆپیشاندانه‌كانی ئێران به‌رزبۆوه‌

کوردستان TV
100%


لە ناڕەزایی دەربڕینەکانی ڕۆژی سێشەممە 20 ی 9 ی 2022، لانی کەم سێ هاووڵاتیی کورد بە تەقەی ڕاستەوخۆی هێزەکانی حکومەتی کۆماری ئیسلامیی ئێران کوژران و زیاتر لە 161 هاووڵاتیش هەر بە دەستڕێژی ئەم هێزانە بریندار بوون و دەیان کەسیش دەستبەسەر کران.

دوای گیان لەدەستدانی فواد قەدیمی یەکێک لە بریندارەکانی ناڕەزایەتییەکانی دیواندەرە و هەروەها کوژرانی ژنێک بە ناوی مینوو مەجیدی لە خۆپیشاندانەکانی کرماشان ژمارەی کوژراوانی چەند ڕۆژی ڕابردووی خۆپیشاندانەکانی ڕۆژهەڵاتی کوردستان بۆ 7 کەس بەرز بووەتەوە کە ناوەکانیان بریتین لە فواد قەدیمی و موحسین محەممەدی خەڵکی دیواندەرە، زەکەریا خەیاڵ16 ساڵە و خەڵکی پیرانشار، فەرجاد دەروێشی خەڵکی ئورمیە، ڕەزا لوتفی خەڵکی دێولان، مینوو مەجیدی خەڵکی قەسری شیرین و فەرەیدوون مەحموودی خەڵکی سەقز.

بە پشتبەستن بە ئاماری تۆمارکراو لە ناوەندی ئامار و بەڵگەنامەکانی ڕێکخراوی مافی مرۆڤی هەنگاو، ڕۆژی سێ شەممە20 ی 9 ی 2022، لانی کەم لە 14 شاری ئاودانان، ئیلام، کرماشان، سنە، مەریوان، ئورمیە، بانە، نەغەدە، قوروە، ڕەبەت، سەردەشت، پیرانشار، ماکۆ و بازرگان، بە مەبەستی ناڕەزایی دەربڕین بەرامبەر بە کوژرانی ژینا ئەمینی، کچی 22 ساڵەی خەڵکی سەقز ڕژانە سەر شەقامەکان و بە دەستوەردانی هێزە ئەمنییەکانی حکومەتی ئێران، خۆپێشاندانەکان بەرەو توندوتیژی چوون و لانی کەم سێ هاووڵاتیی ناڕازی کوژران و 161 کەسیش بریندار بوون.


ئەو شارانەی کە تێیاندا خۆپیشاندان بەرەو توندوتیژی چوو:


پیرانشار: 1 کوژراو و 48 بریندار
ئورمیە: 1 کوژراو و20 بریندار
ماکۆ: 6 بریندار
کرماشان: 1 کوژراو و 26 بریندار
قوروە، 8 بریندار
مەریوان 4 بریندار
ئیلام، 13 بریندار
نەغەدە: 15 بریندار

ئاماری گشتیی چوار ڕۆژی ڕابردوو:


بە پشت بەستن بە ئاماری تۆمار کراو لە ناوەندی ئامار و بەڵگەنامەکانی ڕێکخراوی مافی مرۆڤی هەنگاو، لە چوار ڕۆژی ڕابردوودا بە گشتی 7 هاووڵاتیی کورد بە تەقەی ڕاستەوخۆی هێزە چەکدارەکانی ئێران گیانیان لەدەست داوە و 450 کەسیش بریندار بوون کە زۆربەی ئەو کەسانە لە ترسی دەستبەسەرکرانیان لە لایەن هێزە ئەمنییەکانەوە، سەردانی بنکە تەندروستییەکانیان نەکردووە بەڵام فیلم و وێنەی بریندار بوونیان کەوتووتە دەست هەنگاو و ژمارەیەک لەو دیمەنانەش لە لا پەرەی تۆڕە کۆمەڵایەتییەکانی هەنگاو بڵاو کراونەتەوە.

پۆلێنبەندیی کوژران و بریندار بوونی هاووڵاتییان لە شارەکانی کوردستان

دیواندەرە: 2 کوژراو و 33 بریندار
سەقز: 1 کوژراو و 74 بریندار
بانە: 40 بریندار
مەهاباد: 23 بریندار
بۆکان: 17 بریندار
سنە: 66 بریندار
مەریوان: 9 بریندار
دێولان: 1 کوژراو و16 بریندار
بیجاڕ: 9 بریندار
قوروە: 17بریندار
تیکاب: 7 بریندار
ماکۆ: 6 بریندار
ئورمیە: 1 کوژراو - 20 بریندار
پیرانشار: 1 کوژراو - 48 بریندار
کرماشان: 1 کوژراو و 36 بریندار
ئیلام: 13 بریندار
نەغەدە: 15 بریندار
کۆی گشتی:
7کوژراو و 450 بریندار

دەستبەسەرکرانی زیاتر لە 500 هاووڵاتیی کورد لە ماوەی چوار ڕۆژی ڕابردوودا


بە پشت بەستن بە ئاماری تۆمار کراو لە ناوەندی ئامار و بەڵگەنامەکانی ڕێکخراوی مافی مرۆڤی هەنگاو، لە چوار ڕۆژی ڕابردوودا زیاتر لە 500 هاووڵاتیی کورد لە لایەن هێزە ئەمنییەکانەوە دەستبەسەر کراون کە ناو و شوناسی نزیک بە100 کەسیان بۆ هەنگاو ئاشکرا بووە و لە ڕاپۆرتێکی جیاوازدا بڵاوی دەکەینەوە.


هەنگاو شەوی ڕابردوو لە ئەکاونتی تویتەری خۆیدا ڕایگەیاندبوو 190 کەس لە هاووڵاتییانی دەستبەسەرکراو لە ڕۆژانی ڕابردوودا گوازراونەتەوە بۆ بەندیخانەی ناوەندیی سنە.
 

ئێران

کۆمێنت (0)

تا ئێستا هیچ کۆمێنتێک نەکراوە.

وەڵام بدەوە وەک میوان

دەتەوێت ئاگانامەکان وەربگریت؟
بمێنەوە لەگەڵ نوێترین هەواڵ و ڕووداوەکانمان.