وه‌زیری پێشمه‌رگه و تیمێكی باڵای راوێژكارانی سه‌ربازی ئه‌مریكا كۆبوونه‌وه
وه‌زیری پێشمه‌رگه و تیمێكی باڵای راوێژكارانی سه‌ربازی ئه‌مریكا له‌هه‌ولێر، تاوتوێی دواین گۆڕانكارییه‌كانی ناوچه‌كه‌و مه‌ترسییه‌كانی ئێستای تیرۆریستانی داعش و هه‌نگاوه‌كانی پڕۆسه‌ی چاكسازی له‌وه‌زاره‌تی پێشمه‌رگه و په‌یوه‌ندییه‌كانی نێوان وه‌زاره‌تی پێشمه‌رگه و وه‌زاره‌تی به‌رگری عێراقیان کرد.
ئه‌مڕۆ ١٢ی ١٠ی ٢٠٢١، شۆڕش ئیسماعیل، وه‌زیری پێشمه‌رگه‌ی حكومه‌تی هه‌رێمی كوردستان، پێشوازی له كۆڵۆنێڵ دۆگڵاس، راوێژكاری باڵای سه‌ربازی هێزه‌كانی ئه‌مریكا له‌هه‌ولێر و فه‌رمانده‌ی هێزه‌كانی ئه‌مریكا له‌هه‌رێم، كۆڵۆنێڵ جاك و وه‌فدێكی یاوه‌ری کرد.
له‌كۆبوونه‌وه‌یه‌كه‌دا، كه عه‌مید روكن محەمەد، به‌ڕێوه‌به‌ری هه‌ماهه‌نگی و په‌یوه‌ندییه‌كانی وه‌زاره‌ت ئاماده‌یبوو، وه‌زیری پێشمه‌رگه رایگه‌یاند: قۆناغه‌كانی رێكخستنه‌وه‌ی هێزه‌كانی پێشمه‌رگه به‌ره‌وپێشچوونی باشی به‌خۆیه‌وه بینیوه و هاوكاری و هه‌ماهه‌نگی راوێژكارانی سه‌ربازی ئه‌مریكا و هاوپه‌یمانان جێی بایه‌خ و هۆكاری پێشكه‌وتن و سه‌رخستنی ئه‌و پڕۆسه‌یەیه.
راوێژكاری باڵای سه‌ربازی ئه‌مریكا و به‌رپرسی هێزه‌كانی ئه‌و وڵاته له‌هه‌ولێر، جه‌ختیكرده‌وه له‌سه‌ر كاركردنی هه‌مه‌لایه‌نه‌و هاوبه‌ش بۆ سه‌رخستنی پڕۆسه‌ی چاكسازی، بۆ ئه‌مه‌ش وتی: به‌شێوه‌یه‌كی مه‌یدانی سه‌ردانی باره‌گای لیواكانی وه‌زاره‌تی پێشمه‌رگه ده‌كه‌ین بۆ لێكۆڵینه‌وه له كه‌موكوڕییه‌كان و پڕكردنه‌وه‌ی پێداویستیه‌كان، به‌هه‌ماهه‌نگی له‌گه‌ڵ وه‌زاره‌تی پێشمه‌رگه.
كۆبونه‌وه‌کە، به‌گفتوگۆكردن له‌سه‌ر گرنگی نزیكبوونه‌وه‌ی زیاتری نێوان وه‌زاره‌تی پێشمه‌رگه‌و وه‌زاره‌تی به‌رگری به‌غدا به كۆتا هات.
کۆمێنت (0)
تا ئێستا هیچ کۆمێنتێک نەکراوە.