کۆمسیۆنی باڵای سەربەخۆی هەڵبژاردنەکانی عێراق ئەنجامە سەرەتاییەکانی هەڵبژاردنی پێشوەختەی عێراق ڕادەگەیەنێت و پارتی دیموکراتی کوردستان هەر 11 بەربژێرەکەی لە پارێزگای هەولێر سەرکەوتن بۆ پەرلەمانی عێراق.
ئەمڕۆ دووشەممە 11ـی تشرینی یەکەمی 2021 کۆمسیۆنی باڵای سەربەخۆی هەڵبژاردنەکانی عێراق ئەنجامی دەنگدانی 10 پارێزگای ڕاگەیاند و هەر 11 کاندیدەکەی پارتی لە پارێزگای هەولێر سەرکەوتن.
لە هۆتێل دێدەمان لە پارێزگای هەولێر کۆمسیۆنی باڵای سەربەخۆی هەڵبژاردنەکانی عێراق ئەنجامی هەڵبژاردنی پارێزگای هەولێری خستەڕوو و گشت بەربژێرەکانی پارتی دیموکراتی کوردستان سەرکەوتن بۆ پەرلەمانی عێراق ڕێژەی دەنگەکانیشیان بەم شێوەیەبوو:-
لە بازنەی 1ـی پارێزگای هەولێر سیپان عەزیز 25 هەزار و 233 دەنگی بەدەستهێناوە، نەهرۆ محەممەد 29 هەزار و 649 دەنگی بەدەستهێناوە، هەروەها محەممەد سدیق خۆشناو 24 هەزار و 128 دەنگی بەدەستهێناوە و جوان عەبدوڵڵاش بە دەنگی کۆتا سەرکەوتووە بە بەدەستهێنانی 9174 دەنگ.
لە بازنەی 2ـی پارێزگای هەولێریشدا خدر عەلی سدیق 17 هەزار و 992 دەنگی بەدەستهێناوە، هەروەها ئامانج مەحموود هەرکیش بە بەدەستهێنانی 15 هەزار و 882 دەنگ سەرکەوت بۆ پەرلەمانی عێراق.
لە بازنەی 3شدا ڕێبوار هادی 17 هەزار و 202 دەنگی بەدەستهێناوە و لەیلا ئەکرەمیش 7078 دەنگی بەدەستهێناوە و سەرکەوتوون بۆ پەرلەمانی عێراق.
هەروەها لە بازنەی 4ـی پارێزگای هەولێر، مەریوان قەرەنی 15 هەزار و 118 دەنگی بەدەستهێناوە، سەباح سوبحیش بە بەدەستهێنانی 12 هەزار و 404 دەنگ و نەهلە قادریش بە بەدەستهێنانی 9 هەزار و 995 دەنگ سەرکەوتن بۆ پەرلەمانی عێراق.
شایەنی باسە، پارتی دیموکراتی کوردستان لەکۆی 15 کورسی گشتی و 1 کورسی کۆتای مەسیحییەکان کە تەرخانکرابوو بۆ پارێزگاکە، 11 بەربژێری هەبوو و هەموویان سەرکەوتن بۆ پەرلەمانی عێراق.
کۆمێنت (0)
تا ئێستا هیچ کۆمێنتێک نەکراوە.