پارێزگاری هەولێر، بەشداری لە (41)مین کۆنگرەی کۆمەڵەی نێودەوڵەتی پارێزگار و سەرۆک شارەوانیەکانی فرانکۆفۆنی کرد

ڕۆژی یەکشەمە 2021.7.18، ئومێد خۆشناو، پارێزگاری هەولێر، بەیاوەری هەریەک لە ڕێوان به‌رواری، له‌ نوێنه‌رایه‌تی حکومه‌تی هه‌رێمی کوردستان له‌وڵاتی فه‌ره‌نسا و د.نیاز، بەڕێوەبەری نووسینگەی پارێزگار، بەشداری لە (41) مین کۆنگرەی کۆمەڵەی نێودەوڵەتی پارێزگار و سەرۆک شارەوانیەکانی فرانکۆفۆنی کرد کە لە 18 تاوەکو 22 ی تەمموزی 2021 لە شاری کیگەلی پایتەختی ووڵاتی رواندا، بەردەوام دەبێت.
لەکۆنگرەکەدا، کە زیاتر لە (300) سێ سەد پارێزگار و سەرۆک شارەوانیەکانی شارەکانی جیهان بەشداربوون جگە لە دروستکردنی پەیوەندی و ئاڵوگۆڕکردنی شارەزاییەکان، لە رێگای دەزگای AIMF - Association Internationale des Maires Francophone، بە چەند پانێڵ و دیدارێک لە نێوان پارێزگار و سەرۆک شارەوانییەکان ئاڵوگۆری بیروبۆچوون و بەرنامەی پڕۆژەکانی ئاوەدانکردنەوە و هێنانە دی کۆمەڵگای شارستانی بۆ پێکەوە ژیان گفتوگۆی لەسەر کرا.