له راگه‌یاندراوێكدا وه‌زاره‌تی پێشمه‌رگه‌ی حكوومه‌تی هه‌رێمی كوردستان بڵاوی كرده‌وه: ئەمرۆ 6/7/2021، سەربەست لەزگین بریکاری وەزارەتی پێشمەرگە، بە ئامادەبوونی فەریق جەمال محه‌مه‌د سەرۆکی دەستەی ئەڕکانی وەزارەتی پێشمەرگە، پێشوازی لە کۆڵۆنێڵ ولیەم دەیڤد بەرپرسی راوێژکارانی سەربازی (هاوپەیمانان) لە هەرێمی کوردستان و شاندێکی یاوەری کرد.
وه‌زاره‌تی پێشمه‌رگه‌ی هه‌رێمی كوردستان رایده‌گه‌ێنێت: لە کۆبوونەوەیەکدا، کۆڵۆنێڵ ولیەم دەیڤد کۆتایی هاتنی ئەرکی سەربازی خۆی بە وەزارەتی پێشمەرگە راگەیاند و کۆڵۆنێڵ جێفری تاد برۆوسی وەک شوێن گرەوەی خۆی ناساند.
له به‌شێكی دیكه‌ی راگه‌یاندراوه‌كه‌ی وه‌زاره‌تی پێشمه‌رگه‌دا هاتووه: لەو کۆبوونەوەیەدا، سەربەست لەزگین بریکاری وەزارەتی پێشمەرگە سوپاسی هەوڵ و ماندووبوونی کۆڵۆنێڵ ولیەمی کرد و ئەو هاوکاری و خزمەتەی بەرز نرخاند، کە بە پێشمەرگەی کردووە لە بواری راوێژکاری و هاوکارییە سەربازییەکاندا.
وه‌زاره‌تی پێشمه‌رگه ئاماژه بۆ ئه‌وه‌شده‌كات: لەلایەکی ترەوە بەخێرهاتنی کۆڵۆنێڵ جێفری تاد برۆوسی کرد، وەک بەرپرسی نوێی راوێژکارانی (هاوپەیمانان) لە هەرێمی کوردستان و هیوای سەرکەوتنی بۆخواست لە ئەرکە نوێکەیدا، بەڵێنی دا، کە هاوکارو هەماهەنگ بێت لە پێشخستن و سەرخستی ئەرکەکەیدا، بۆ بەهێزکردن و بەرەوپێش بردنی تواناکانی هێزەکانی پێشمەرگە.
لەکۆتایی کۆبونەوەکەدا وه‌زاره‌تی پێشمه‌رگه رایده‌گه‌ێنێت، هەریەک لە بریکاری وەزارەت و سەرۆکی دەستەی ئەڕکانی وەزارەتی پێشمەرگە، دیاریان بەخشی بە کۆڵۆنێڵ ولیەم دەیڤد و ماڵئاواییان لێکردو هیوای سەرکەوتنیان بۆ خواست لە ئەرکە سەربازییەکانی لە داهاتوودا.
دارشتنه‌وه‌ی هه‌واڵ - شوان عه‌زیز
کۆمێنت (0)
تا ئێستا هیچ کۆمێنتێک نەکراوە.