لە گەڕی سێیەم و كۆتایی قۆناغی یەكەمی جامی نەتەوەكانی ئەوروپا ، هەڵبژاردەی ئیسپانیا سەركەوتنێكی گەورەی بەدەستهێناو بە پێنج گۆڵی بێ بەرامبەر لە هەڵبژاردەی سلۆڤاكیای میوانی بردەوە.
یاریگای لاكارتوخا لە شاری سیڤیلیە یاریەكەی بەخۆوە گرت، لە خولەكی سییدا، مارتن دوبراڤكا گۆڵپارێزی سلۆڤاكیا گۆڵێكی بۆ ئیسپانیا بە هەڵە لە گۆڵی تیپەكەی خۆی تۆماركرد.
لە خولەكی سێیەمی كاتی زیادكراوی گێمی یەكەمیش، یاریزان ئێمیریك لاپۆرت گۆڵی دووەمی تیپی میوانداری بەدەستهێناو ئەم گێمە بەم ئەنجامە بە سوودی ئیسپانیەكان تەواوبوو، لە گێمی دووەم و لە خولەكی پەنجاوشەشدا، یاریزان پابلۆ سارابیا گۆڵی سێیەمی ئیسپانیای تۆماركرد.
دواتر یاریزان فێران تۆرێس گۆڵی چوارەمی ماتادۆری لە خولەكی شەستوحەوت بەدەستهێنا، لە خولەكی حەفتاویەكیش، جورای كوشكا یاریزانی سلۆڤاكیا گۆڵی پێنجەمی ئیسپانیای بە هەڵە لە گۆڵی تیپەكەی خۆی تۆماركردو كۆتایی بە كەرنەڤالی گۆڵەكانی یاریەكە هێنا.
بەم بردنەوەش كۆی خاڵەكانی ئیسپانیا بۆ پێنج خاڵ بەرزبووەوەو بە پلەی دووەمی گڕوپی پێنجەم خۆی گەیاندە قۆناغی شازدە، سلۆڤاكیاش بە سێ خاڵ لە پلەی سێیەمی ڕیزبەندی گڕوپەكە مایەوەو ماڵئاوایی لە جامی یۆرۆ كرد .
کۆمێنت (0)
تا ئێستا هیچ کۆمێنتێک نەکراوە.