وەزارەتی دەرەوەی تورکیا سەبارەت بە کۆمەڵکوژیی ئەرمەنەکان وەڵامی ئەمەریکا دەداتەوە

لە یادی 106 ساڵەی كۆمەڵكوژی ئەرمەنەكان لەلایەن دەوڵەتی عوسمانییەوە، جۆبایدن سەرۆكی ئەمریكا ئەو تاوانەی بە جینۆساید ناساند، وەزارەتی دەرەوەی تورکیا، ئیدانەی ئەو راگەیەندراوەی کرد کە جۆ بایدن دەربارەی رووداوەکانی 1915 بڵاویکردبووەوە.

وەزارەتی دەرەوەی تورکیا لە راگەیەندراوەکەیدا نوسیوویەتی: لێدوانەکەی سەرۆکی ئەمریکا لە 24ی نیسان لەبارەی رووداوەکانی 1915 ، بە ھیچ شێوەیەک قبوڵ ناکەین و بە توندی ئیدانەی دەکەین".

جەخت لەوەش کراوەتەوە کە راگەیەندراوەکەی بایدن هیچ بنەمایەکی زانستی و یاسایی نییە، چونکە هیچکام لەو مەرجانەی بۆ بە کۆمەڵکوژی ناساندن پێویستن لە رووداوەکانی 1915دا نین.

ئەوەش وەبیرهێندراوەتەوە کە ئەرمینیا، پێشنیازەکەی تورکیا-ی بۆ دروست کردنی کۆمسیۆنێکی مێژوویی هاوبەش لە ساڵی 2005دا پەسەند نەکردووە، هەتا ئێستاش تورکیا بۆ یەکلاییبوونەوەی راستییەکان هەمان پێشنیازی هەیە.

لە راگەیەندراوەکەی وەزارەتی دەرەوەی تورکیا، جارێکی دیکەش بەرێزەوە یادی ئەو هاووڵاتییە موسوڵمان، مەسیحی و جوولەکانەی دەوڵەتی عوسمانی کراوەتەوە کە لە سەروبەندی جەنگی جیهانی یەکەمدا لە بارودۆخی ناهەمواردا گیانیان لەدەستداوە و باس لەوەش کراوە کە ئەو پەیامەی دەربارەی گیان لەدەستدانی هاووڵاتییە ئەرمەنییەکانی ناو دەوڵەتی عوسمانی، ئەمڕۆ سەرکۆماری تورکیا، رەجەب تەیب ئەردۆغان ئاڕاستەی پاتریارکی ئەرمەنییەکانی تورکیای کرد، رەنگدانەوەی تێڕوانینی حکومەتی ئەنقەرە-یە دەربارەی پرسەکە.

وەزارەتی دەرەوەی تورکیا، جەختی لەوەش کردوەتەوە کە سەرۆکی ئەمریکا نە لە روانگەی رەوشت و نە لە روانگەی یاساییەوە مافی ئەوەی نییە لە پرسە مێژووییەکاندا بڕیار بدات، هەر بۆیە راگەیەندراوەکەی هیچ بەهایەکی نییە.

له‌ به‌یاننامه‌كه‌ی كۆشكی سپیدا هاتووه‌، جۆبایدن كۆمه‌ڵكوژییه‌كه‌ی ئه‌رمه‌نییه‌كانی به‌ جینۆساید ناساند، ئه‌و كوشتارگه‌یه‌ی ئه‌رمه‌نییه‌كان له‌سه‌رده‌می ئیمپراتۆریه‌تی عوسمانییه‌كان تووشی هاتن و چه‌ندین بیرمه‌ند و سه‌ركرده‌ی ئه‌رمه‌نییه‌كان ده‌ستگیركران له‌ (24ی نیسانی 1915)، به‌ كۆمه‌ڵكوژی هه‌ژمار ده‌كرێت.