نیویۆرک تایمز: تره‌مپ بۆمبی زیره‌کی بۆ به‌رپه‌رچدانه‌وه‌ی ئێران ڕاده‌ستی سعوودیه‌ کردووه‌

رۆژنامه‌ی نیویۆرك تایمزی ئه‌مریكی بڵاویكرده‌وه‌ كه‌ دۆنالد تره‌مپ سه‌رۆكی ئه‌مریكا بۆمبی زیره‌كی بۆ به‌رپه‌رچدانه‌وه‌ی ئێران ڕاده‌ستی سعودیه‌ كردووه‌. 

نیویۆرك تایمز ئاماژه‌ی به‌وه‌شكردووه‌ كه‌ سه‌رۆكی ئه‌مریكا به‌بێ ره‌زامه‌ندی كۆنگرێس زیاتر له‌ 20 گرێبه‌ستی چه‌كی له‌گه‌ڵ ژماره‌یه‌ك وڵاتی عه‌ره‌بی واژۆكردووه‌. 

به‌پێی زانیارییه‌كانی نیویۆرك تایمز، گرێبه‌سته‌كان بریتین له‌ فرۆشتنی 120 بۆمب به‌ سعودیه‌ و ئیمارات و چاككردنه‌وه‌ی فرۆكه‌ جه‌نگییه‌كانی سعودیه‌ له‌ جۆری ئێف 15 و دژه‌ تانك.

پێشتریش وه‌زیری ده‌ره‌وه‌ی ئه‌مریكا مایك پۆمپیۆ رایگه‌یاندبوو كه‌ بڕیاره‌كه‌ به‌ پێی یاسای خێرا و به‌بێ ره‌زامه‌ندی كۆنگرێس بووه‌ و 22 رێككه‌وتن له‌باره‌ی فرۆشتنی چه‌ك به‌ سعودیه‌ و ئیمارات و ئوردن كراوه‌ و بڕی كۆی گرێبه‌سته‌كان هه‌شت میلیار و 100 ملیۆن دۆڵاره‌ و بۆ رووبه‌ڕووبوونه‌وه‌ی ئێران ئه‌و گرێبه‌ستانه‌ واژۆ كراون.