محەمەد جەواد زەریف، وەزیری دەرەوەی ئێران لە نامەیەکی فەرمیدا بۆ ئەنتۆنیۆ گۆترێس، سکرتێری گشتیی نەتەوە یەکگرتووەکان و ئەنجومەنی ئاسایش، لە بەرانبەر ئەو بڕیارەی ئەمریکا کە سوپای پاسدارانی خستووەتە لیستەی گرووپە تیرۆریستییەکانەوە ناڕەزایی دەربڕیوە.
وەزیری دەرەوەی ئێران لە نامەکەیدا سەرەڕای ناڕەزایی دەربڕین بەو بڕیارەی ئەمریکا، نەتەوە یەکگرتووەکانی ئاگادار کردووەتەوە کە واشنتۆن لە بەرانبەر کاردانەوە و لێکەوتەکانی ئەو بڕیارە بەرپرسیارە.
محەمەدجەواد زەریف لەو نامەیەدا کە ماڵپەڕی (ئیرنا) بڵاوی کردووەتەوە ئەو هەوڵەی دەوڵەتی ئەمریکا کە بەشێکی فەرمی لە هێزە چەکدارەکانی کۆماری ئیسلامیی ئێرانی خستووەتە ناو لیستەی ڕێکخراوە تیرۆریستییە دەرەکییەکانی بە بێوێنە، نایاسایی و مەترسیدار وەسف کردووە.
دووشەممەی هەفتەی پێشوو دۆناڵد ترەمپ، سەرکۆماری ئەمریکا سوپای پاسدارانی کۆماری ئیسلامیی ئێرانی خستە ناو لیستەی گرووپە تیرۆرسیتییەکانەوە و ئەمەش کاردانەوەی توندی سوپای پاسداران و بەرپرسانی باڵای ئەو وڵاتەی لێ کەوتەوە.
بە گوتەی سەرکۆماری ئەمریکا، سوپای پاسداران "ئامرازی سەرەکیی حکوومەتی ئێرانە لەپێناو جێبەجێکردنی پلانە تیرۆریستییەکانی ئەو وڵاتە"دا.
کۆمێنت (0)
تا ئێستا هیچ کۆمێنتێک نەکراوە.