ئه‌مڕۆ چوارشه‌ممه 11/7/2018، عێراق و ئێران له‌رێگه‌ی ده‌روازه‌ی سنووری مه‌نزه‌ریه‌ی سه‌ر به پارێزگای دیاله روفاتى 116 سه‌ربازی سه‌رده‌می شه‌ڕی هه‌شت ساڵه‌ی نێوانیان ئاڵوگۆڕ كرد.
له‌م باره‌وه كه‌ریم عه‌لی ئاغا جێگری پارێزگاری دیاله، كه به‌شداربووی مه‌راسیمی ئاڵوگۆڕكردنی روفاته‌كان بوو، به ده‌نگی ئه‌مریكای راگه‌یاند" ئه‌و روفاتانه‌ی ئه‌مڕۆ ئاڵوگۆڕكران، 116 رووفات بوون، كه 74 روفاتیان، روفاتی سه‌ربازانی عیراقی بوون كه له خاكی ئێران دۆزراونه‌ته‌وه و 42 روفاتیان هی سه‌ربازی ئێران بوون ، كه له خاكی عیراق بوون.
جێگری پارێزگاری دیاله ئاماژه‌شی به‌وه‌دا كه ئاڵوگۆڕكردنه‌وه‌ی روفاته‌كان به‌پێی رێكه‌وتنێكی نێوان هه‌ردوو وڵات بووه، كه پێشتر له‌شاری هه‌ولێر له‌نێوانیاندا واژۆ كراوه.
روونیشیكرده‌وه، كه به‌پێی رێككه‌وتنه‌كه، ئاڵوگۆڕكردنی روفاته‌كان درێژه‌یان ده‌بێت، ئه‌وه‌ی ئه‌مڕۆ وه‌جبه‌ی یه‌كه‌می پرۆسه‌ی ئاڵوگۆڕكردنی روفاته‌كان بوو له‌نێوان هه‌ردوو وڵاتدا".
كه‌ریم عه‌لی راشیگه‌یاند" ناسنامه‌ی 14 سه‌ربازی عیراقی و 11 سه‌ربازی ئێرانی ئاشكرابووه، سه‌ربازه‌كانی تر نه‌ده‌ناسرانه‌وه و ناسنامه‌كانیان دیار نییه.
کۆمێنت (0)
تا ئێستا هیچ کۆمێنتێک نەکراوە.