شاخەوان عەبدوڵا، پەرلەمانتاری كوردو ئەندامی لیژنەی ئاسایش و بەرگری لە پەرلەمانی عێراق رایگەیاند" بۆچوونی بەرپرسانی بەغدا لەبارەی گەڕانەوەی هێزی پێشمەرگە بۆ ناوچەكانى ده‌ره‌وه‌ى ئیداره‌ى هه‌رێمى كوردستان یەك نییە و هۆشداریشى لە سوود وەرگرتنی داعش لە بۆشایی ئه‌منى لەو ناوچانە دا.
شاخەوان عەبدوڵا روونی كردەوە، بەرپرسانی حكوومەتی عێراق لەبارەی گەڕانەوەی پێشمەرگە بۆ ئەو ناوچانە یەك بۆچوون نین و هەیانە لەبەر هۆكاری په‌یوەست بە هەڵبژاردنەكانەوە ئەو هەنگاوە رەت دەكاتەوە، بەڵام بەهۆی دۆخی ئه‌منییه‌وه پێویست بە گەڕاندنەوەی بنكەی هاوئاهەنگی هاوبەش لە نێوان هێزەكانی عێراق و پێشمەرگە و دووبارە گەڕانەوەی پێشمەرگە بۆ شوێنەكانی پێشوویان دەكات، كە پێشتر دوای هاوئاهەنگیی پێشوەختە و لەسەر پێشنیازێكی هاوبەش لەگەڵ هاوپەیمانی نێودەوڵەتی بۆ هەردوولایەنی عێراق و كورد.
عەبدوڵا بەدووری نەزانی كە رێكخراوی داعش سوود لە بۆشایی ئه‌منى لە ناوچەكانى ده‌ره‌وه‌ى ئیداره‌ى هه‌رێم ببینێت و رەنگە پێشێلكارییەكانی ئه‌منى لە ماوەی داهاتوودا زیاتر بن و رەنگە چەكداران بتوانن كاریگەری بۆ سەر ناوچەكانی كەركووك و دەشتی مووسڵ دروست بكەن وەك ئەوەی لە 2014 رووی دا.
لە 25ی ئازاری رابردوو شاندێكی باڵای سەربازی ئەمەریكایی و بەریتانیایی سەردانی وەزارەتی بەرگریی عێراقیان كرد و دواتر لە 27ی ئازار لەگەڵ وەزارەتی پێشمەرگەی هەرێم كۆبوونەوە و باسی گەڕانەوەی پێشمەرگەیان بۆ كەركووك و ناوچە كێشەلەسەرەكان كرد، ئەوەیش دوای دامەزراندنی ژوورێكی هاوئاهەنگی تەناهی لە نێوان حكوومەتی عێراق و هەرێمی كوردستان كە بارەگەكەی لە سەربازگەی كەی وەن لە باشووری كەركووك بێت.
سه‌رچاوه: شه‌فه‌ق نیوز
کۆمێنت (0)
تا ئێستا هیچ کۆمێنتێک نەکراوە.