رێبوار تاڵه‌بانی ، سه‌رۆكی ئه‌نجومه‌نی پارێزگای كه‌ركوك له كۆنگره‌یه‌كی رۆژنامه‌وانیدا رایگه‌یاند: به‌ڵێنیان دابوو به هاووڵاتیانی شاری كه‌ركوك و ئه‌و خه‌ڵكه‌ی كه له كاره‌ساتی رووداوی 16 ئۆكتۆبه‌ر زیانیان به‌ركه‌وتووه ، كه به هه‌موو شێوه‌یه‌ك هه‌وڵی ئه‌وه ده‌ده‌ن بارودۆخی كه‌ركوك بگه‌رێته‌وه پێش 16ی ئۆكتۆبه‌ر.
راشیگه‌یاند: ئه‌وان موڵه‌تی ئه‌وه‌یان به حكومه‌تی عێراق داوه كه ته‌واوی كێشه‌كان چاره‌سه‌ر بكرێت و بارودۆخی كه‌ركوك بگه‌رێته‌وه پێش 16ی ئۆكتۆبه‌ر كه یاسا تێدا سه‌روه‌ر بوو و مافی گشت هاوڵاتیانیش به كورد و عه‌ره‌ب و توركمان پارێزراو بوو.
ئه‌مه له كاتێكدایه كه ئه‌وان یاداشتێكیان داوه‌ته هه‌رسێ سه‌رۆكایه‌تییه‌كه سه‌رۆكایه‌تی كۆمار و سه‌رۆكایه‌تی حكوومه‌ت و سه‌رۆكی په‌رله‌مانیان ئاگادار كردۆته‌وه كه بارودۆخی ئه‌و ناوچانه زۆر نایاساییه‌و و نا ده‌ستورییه له كاتێكدا كه پێش 16 ئۆكتوبه‌ر یاسا سه‌روه‌ر بوو .
تاڵه‌بانی گوتیشی: وه‌كو نوێنه‌ری خه‌ڵكی كه‌ركوك له‌گه‌ڵ كلد و سریانیه‌كان له رۆژی پێنجشه‌ممه‌ی رابردوو سكاڵایه‌كی یاساییمان له دادگای فیدراڵی تۆمار كردووه و هیواداریشین دادگای فیدرالی عه‌داله‌ت به‌رقه‌رار بكات .
تاڵه‌بانی راشیگه‌یاند: حكومه‌تی عێراقی بووته به‌ربه‌ستیك له به‌رێوه‌بردنی كاری ئیداری له كه‌ركوك و ئه‌و گورانكارییانه‌ی كه له كه‌ركوك دا ئه‌نجامی ده‌ده‌ن به هیچ شێوه‌یه‌ك قبوڵ ناكه‌ین و گوتیشی، ئێمه ئاگامان له‌وه هه‌یه كه هه‌وڵی گورینی دیموگرافیای ناوچه‌كه ده‌درێت به‌ڵام به هیچ شێوه‌یه‌ك ئه‌مه قبوڵ ناكه‌ین و نایاسایی و ناده‌ستورییه .
کۆمێنت (0)
تا ئێستا هیچ کۆمێنتێک نەکراوە.