وەزارەتی ناوخۆی بەریتانیا (Home Office) ڕایگەیاند، کە هەڵمەتەکانی بەرەنگاربوونەوەی کارکردنی نایاسایی گەیشتووەتە ئاستێکی پێوانەیی. لە مانگی تەممووزی 2024ەوە تاوەکو ئێستا، زیاتر لە 17000 کەس بە تۆمەتی کارکردنی نایاسایی دەستگیر کراون، کە ئەم ژمارەیە دوو هێندەی تێکڕای دەستگیرکراوانی دوو ساڵی ڕابردووە.
ئەم چڕکردنەوەیەی ڕێکارە ئەمنییانە ئەنجامی بەرچاوی هەبووە و تاوەکو ئێستا زیاتر لە 2,300 کەس لەو تۆمەتبارانەی بەهۆی کارکردنی نایاساییەوە دەستگیر کرابوون، بۆ وڵاتەکانی خۆیان گەڕێندراونەتەوە. حکوومەت جەخت دەکاتەوە کە بەردەوام دەبێت لە فشارخستنە سەر ئەو لایەنانەی کە یاساکانی کۆچ و کارکردن پێشێل دەکەن.
بڕیارە لە مانگی تشرینی یەکەمەوە، ئەو کۆمپانیایانەی کە پشت بە کارمەندی کاتی یان گرێبەستی "کاتژمێری سفر" دەبەستن، ناچار بکرێن بە ئەنجامدانی پشکنینی فەرمی بۆ مافی کارکردنی فەرمانبەرەکانیان. ئامانج لەم بڕیارە داخستنی ئەو کەلێنە یاساییانەیە کە قاچاخچییەکان و کارمەندانی نایاسایی سوودی لێ دەبینن.
ئەو خاوەنکارانەی پابەندی ئەم ڕێسا نوێیانە نابن، ڕووبەڕووی سزای دارایی قورس دەبنەوە کە بڕەکەی دەگاتە 60,000 پاوەند بۆ هەر کرێکارێک. جگە لەوەش، ئەگەری هەیە لێپرسراوانی کۆمپانیاکان لە کارەکانیان دوور بخرێنەوە یان سزای زیندانیکردن بۆ ماوەی تاوەکو 5 ساڵیان بەسەردا بسەپێنرێت.
کۆمێنت (0)
تا ئێستا هیچ کۆمێنتێک نەکراوە.