دۆناڵد ترەمپ، سەرۆکی ویلایەتە یەکگرتووەکانی ئەمریکا، ڕایگەیاند کە وڵاتەکەی خاوەنی بڕێکی یەکجار زۆر و بێپێشینە لە تەقەمەنی و کەرەستەی سەربازییە، هاوکات هۆشداریی توندی دایە ئەو کەسانەی زانیارییە نهێنییەکانی دەوڵەت دزە پێ دەکەن و بە "خاین" وەسفی کردن.
سەرۆکی ئەمریکا لە پەیامێکی نوێدا لە تۆڕی کۆمەڵایەتی "ترووس سۆشیاڵ" ئاماژەی بەوە کرد، کە ئەمریکا خاوەنی کۆگایەکی گەورەی "تەقەمەنی"یە (Munitions)، بەتایبەتی لە جۆرە دیاریکراو و ستراتیژییەکان. ترەمپ جەختی کردەوە کە بڕێکی زۆر لەو چەکانە بە بەردەوامی بەرهەم دەهێنرێن و بەپێی پێویستیی سوپا دەگوازرێنەوە، و وتی: "کۆمپانیاکانی بەرگری خەریکی بونیادنانی گەورەترین ژمارەی کارگە و دامەزراوەی سەربازین لە مێژووی وڵاتەکەماندا."
لە بەشێکی توندی پەیامەکەیدا، ترەمپ ڕووی دەمی کردە ئەو کەسانەی کە زانیاری و لێدوانە هەستیارەکانی ناو کۆشک ی سپی و وەزارەتی بەرگری بڵاو دەکەنەوە. ئەو وتی کە "دزەپێکەرانی" ئەم زانیارییە خیانەتکارییانە (Treasonous statements) لە ئێستادا ڕاو دەنرێن و لە ژێر چاودێرییەکی وردی ئەمنیدان. سەرۆکی ئەمریکا بەڵێنی دا کە کار دەکات بۆ ئەوەی ئەم کەسانە ڕووبەڕووی "سزای زیندانیی درێژخایەن" ببنەوە.
ئەم لێدوانانەی ترەمپ لە کاتێکدایە کە واشنتۆن لە لایەکەوە لە ناو دانوستاندایە لەگەڵ تاران و لە لایەکی دیکەشەوە گەمارۆیەکی توندی دەریایی بەسەر گەرووی هورمزدا سەپاندووە. چاودێرانی سیاسی پێیان وایە، ترەمپ دەیەوێت لە ڕێگەی ئاشکراکردنی توانای بەرهەمهێنانی چەک، پەیامێکی هێز ئاڕاستەی نەیارەکانی ئەمریکا بکات، هاوکات دەیەوێت درزە ئەمنییەکانی ناوخۆی ئیدارەکەی دابخات کە لە ماوەی ڕابردوودا بوونەتە هۆی بڵاوبوونەوەی چەندین ڕاپۆرتی هەواڵگریی هەستیار.
تاوەکو ئێستا وەزارەتی بەرگریی ئەمریکا (پێنتاگۆن) وردەکاریی زیاتری لەبارەی جۆری ئەو تەقەمەنییە نوێیانە و ناسنامەی ئەو کەسانە بڵاونەکردووەتەوە کە گومانی دزەپێکردنی زانیارییان لێ دەکرێت، بەڵام پەیامەکەی ترەمپ نیشانەی توندتربوونی ڕێکارە ئەمنییەکانە لە ناو جەرگەی دەسەڵاتی واشنتۆندا.
کۆمێنت (0)
تا ئێستا هیچ کۆمێنتێک نەکراوە.