فەرماندەی گشتیی هێزەکانی سووریای دیموکرات (هەسەدە) ڕایگەیاند، دوای نێوەندگیرییە نێودەوڵەتییەکان گەیشتوونەتە لێکتێگەیشتنێک بۆ ڕاگرتنی شەڕ لە گەڕەکەکانی شێخ مەقسوود و ئەشرەفییە و گواستنەوەی شەڕڤانان و هاووڵاتییان بۆ ناوچەکانی باکوور و ڕۆژهەڵاتی سووریا.
مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) لە ڕاگەیاندراوێکدا ئاشکرای کرد، دوای هەوڵی لایەنە نێودەوڵەتییەکان بۆ ڕاگرتنی هێرش و پێشێلکارییەکان، گەیشتوونەتە لێکتێگەیشتنێک کە دەبێتە هۆی ڕاگرتنی تەقە.
مەزڵووم عەبدی ڕوونی کردووەتەوە، بەپێی لێکتێگەیشتنەکە زامنکردنی چوونەدەرەوەی تەرمی شەهیدان، برینداران، مەدەنییە گەمارۆدراوەکان و شەڕڤانان لە هەردوو گەڕەکی ئەشرەفییە و شێخ مەقسوودەوە بەرەو ناوچەکانی باکوور و ڕۆژهەڵاتی سووریا مسۆگەر دەکرێت.
فەرماندەی گشتیی هەسەدە داوای لە لایەنە نێوەندگیرەکان کردووە کە پابەندی بەڵێنەکانیان بن بۆ ڕاگرتنی پێشێلکارییەکان و کارکردن بۆ گەڕانەوەیەکی ئارامی ئاوارەکان بۆ سەر ماڵ و حاڵی خۆیان لە داهاتوودا.
لە کۆتایی پەیامەکەیدا مەزڵووم عەبدی ستایشی بەرگریی شەڕڤانان و خۆڕاگریی دانیشتووانی ئەو دوو گەڕەکەی حەلەبی کردووە و وێڕای سەرەخۆشی لە کەسوکاری قوربانییان، هیوای چاکبوونەوەی بۆ برینداران خواستووە.
کۆمێنت (0)
تا ئێستا هیچ کۆمێنتێک نەکراوە.