بارەگای بارزانی پرسە و سەرەخۆشی ئاراستەی کەسوکاری قوربانیانی لافاوەکەی کەرکووک و چەمچەماڵ دەکات و هیوای چاکبوونەوە بۆ برینداران دەخوازێت و داواش لە دەزگای خێرخوازیی بارزانی دەکات كە بە زووترین كات بە هانای لێقەوماوان و زیانلێكەوتوانی ئەو ڕووداوە بچن.
ئەمڕۆ سێشەممە 9ـی کانوونی یەکەم، بارەگای بارزانی پەیامێکی سەرەخۆشی ئاراستەی خانەوادە و کەسوکاری قوربانیانی ڕووداوەکانی چەمچەماڵ و کەرکووک کرد و داوایان لە دەزگای خێرخوازی بارزانی کرد بە زووترین کات بە هانای لێقەوماوانەوە بچن.
دەقی پەیامی بارەگای بارزانی:
بەناوی خودای بەخشندە و میهرەبان
بەداخێكی زۆرەوە لە ئەنجامی بارانبارینی زۆر و لافاوەوە لە سنووری قەزای چەمچەماڵ و لەیلان لە كەركووك سێ هاووڵاتی گیانیان لەدەستدا و ژمارەیەكی تریش بریندار بوون، پرسە و سەرەخۆشیی خۆمان ئاراستەی خانەوادە و كەسوكاری قوربانیان دەكەین و لە خودای گەورە داواكارین گیانی خوالێخۆشبوان بە بەهەشتی بەرین شاد بكات و سەبر و ئارامی بە كەسوكاریان ببەخشێت و هەروەها هیوای چاكبوونەوەی خێرا بۆ برینداران دەخوازین.
داواش لە دەزگای خێرخوازیی بارزانی دەكەین كە بە زووترین كات بە هانای لێقەوماوان و زیانلێكەوتوانی ئەو ڕووداوە بچن و ئەوەی لە توانایاندا بێت بۆ یارمەتیدانیان ئەنجام بدەن.
کۆمێنت (0)
تا ئێستا هیچ کۆمێنتێک نەکراوە.