بەرێوەبەرایەتیی گشتیی حەج و عومڕەی هەرێمی کوردستان وادەی دەستپێکردنەوەی گەشتەکانی عومڕەی بۆ وەرزی 2025-2026 راگەیاند و دەڵێت، گەشتە زەمینییەکان لە 16ـیتەمووز و گەشتە ئاسمانییەکان لە 18ـی تەمووزەوە دەستپێدەکەنەوە. هاوکات داوا لە کۆمپانیاکان دەکات بۆ نوێکردنەوەی گرێبەستەکانیان سەردانیان بکەن.
ئەمڕۆ یەکشەممە 13ـی تەمووز، بەرێوەبەرایەتیی گشتیی حەج و عومڕەی هەرێمی کوردستان لە راگەیێندراوێکدا رێنماییەکانی وەرزی نوێی عومڕەی (2025-2026) بڵاوکردەوە و رایگەیاند، دوای پەسندکردنی پرۆژەیەک لەلایەن وەزارەتی ئەوقاف و کاروباری ئایینییەوە، رێکارەکان بۆ دەستپێکردنەوەی گەشتەکان گیراونەتەبەر.
لە راگەیێندراوەکەدا، داوا لە سەرجەم کۆمپانیاکانی حەج و عومڕە و کۆمپانیاکانی بەرنامەفرۆشی عومڕە کراوە کە مۆڵەتی فەرمییان هەیە، رۆژی سێشەممە، 15ـی تەمووز 2025، سەردانی بەرێوەبەرایەتیی گشتیی حەج و عومڕە بکەن بۆ ئەنجامدانی گرێبەستی نوێ.
دوای تەواوکردنی رێکارەکان، کۆمپانیاکان دەتوانن لە رۆژی چوارشەممە، 16ـی تەمووز 2025، گەشتی وشکانی و لە رۆژی هەینی، 18ـی تەمووز 2025، گەشتی ئاسمانی لە رێگەی فڕۆکەخانەکانی هەولێر و سلێمانییەوە دەستپێبکەنەوە.
بەرێوەبەرایەتییەکە جەختدەکاتەوە کە کۆمپانیاکان پێویستە تەواوی پێداویستییەکانی گرێبەست لەگەڵ خۆیان بهێنن، چونکە بەبێ تەواوبوونی پێداویستییەکان، هیچ گرێبەستێک ئەنجام نادرێت.
لە کۆتایی راگەیێندراوەکەدا، بەرێوەبەرایەتیی گشتیی حەج و عومڕە داوا لە هاووڵاتییان دەکات، تەنیا لەگەڵ ئەو کۆمپانیایانە گەشت بکەن کە مۆڵەتی فەرمییان هەیە و داوای بینینی مۆڵەتەکەیان لێ بکەن، کە بە شێوەی تابلۆی هەڵواسراو بە کۆمپانیاکان دەدرێت.
کۆمێنت (0)
تا ئێستا هیچ کۆمێنتێک نەکراوە.