بەڕیوەبەری پرۆژەکانی رێگاوبانی هێمن گرووپ دەڵێت، دوو هەزار کەس لە دوو سایدی کەسنەزان – گۆمەسپان کار دەکەن و 99٪ـیان کوردن و دەشڵێت، تا کۆتایی ساڵی داهاتوو پرۆژەکە رادەست دەکەنەوە.
ئەمڕۆ یەکشەممە 13ـی تەمووز، ئەمیر عەبدولخالق بەڕێوەبەری پرۆژەکانی رێگاوبان لە کۆمپانیای هێمن گرووپ، بە دیجیتاڵ میدیای کورستان تیڤی ڕاگەیاند: "پرۆژەی دووسایدی هەولێر - دەربەندی گۆمەسپان دەستی پێ کردووە و لە کۆتایی ساڵی 2026 رادەست دەکرێتەوە".
ئەمیرعەبدولخالق دەڵێت، درێژی شەقامەکە 15 کیلۆمەترە، لە کۆتایی شەقامی کەسنەزان دەست پێ دەکات و لە دەربەندی گۆمەسپان کۆتایی دێت.
بەڕێوەبەری پرۆژەکانی رێگاوبان لە کۆمپانیای هێمن گرووپ لەبارەی تایبەتمەندییەکانی دووسایدەکە گوتی، پانی هەر سایدێک 10 مەتر و 75 سانتیمە و دوو رێرەوی سەرەکی و رێرەوێکی فریا گوزاری دەبێت.
بە گوتەی ئەمیر عەبدولخالق، لە درێژەی دووسایدەکەدا چوار پرد و یەک ئەندەرپاسی تێدەکەوێت و 40 ئاوبەری سندووقی قەبارە درێژ و جۆراوجۆر و پەرژینی خۆپاراستن و سیستمی ئاوەڕۆشی دەبێت.
بەڕێوەبەری پرۆژەکانی هێمن گرووپ دەڵیت، لەم پرۆژەیەدا دوو هەزار کارمەد و 600 ئامێری جۆراوجۆر کاری تێدا دەکەن و 99٪ـی پشتی بە هێزی کاری ناوخۆیی بەستووە.
ئەمیر عەبدولخالق سەبارەت بە رێگای کۆنی هەولیر - دەربەندی گۆمەسپان دەڵێت؛ ئێستا ئەو رێگایە کراوەیە و داناخرێت تا یەکێک لە سایدەکانی شەقامە تازەکە کۆتایی دێت، دواتر رێگای کۆن دادەخەین و تا وادەی کۆتایی پرۆژەکە شۆفێران دەتوانن هەمان ساید بەکار بهێن.
کۆمێنت (0)
تا ئێستا هیچ کۆمێنتێک نەکراوە.