شەوی رابردوو وەزیری دەرەوەی عومان بە میدیاکانی راگەیاند؛ بە چەند هۆکارێکی لۆجەستی و هونەری گەڕی چوارەمی دانوستانەکانی واشنتن و تاران لە رۆژی دووشەممەی داهاتوودا بەڕێوەناچێت و گوتەبێژی وەزارەتی دەرەوەی ئەمەریکاش دەڵێت؛ "ئێمە هەرگیز گفتوگۆمان لەبارەی یەکلاییبوونەوەی کات و شوێنی دانوستانەکە لەگەڵ ئێران نەکردووە".
رۆژی هەینی 2ـی ئایاری 2025 تۆمی برووس، گوتەبێژی وەزرەتی دەرەوەی ئەمەریکا لە کۆنفرانسێکی رۆژنامەڤانیدا لەبارەی کات و شوێنی گەڕی چوارەمی دانوستانی ئەتۆمی ئێران و ئەمەریکا گوتی؛ ئێمە هەرگیز بڕیاری یەکلاییکەرەوەمان لەبارەی کات و شوێنی دانیشتنەکە نەداوە.
گوتەبێژی وەزارەتی دەرەوەی ئەمەریکا گوتی؛ "بەڵام دەتوانم پێتان بڵێم کە لە ئایندەیەکی نزیکدا بەگوێرەی ئەو زانیارییانەی لە نوێنەری ئەمەریکا بۆ دانوستانەکەم وەرگرتووە، دیدارەکە ئەنجام دەدرێت و هەرکات وردەکارییەکان گەیشتنە دەستم، میدیاکانی لێ ئاگادار دەکەمەوە".
پێشتر وەزارەتی دەرەوەی عومان و وەزیری دەرەوەی ئێران رایانگەیاندبوو کە گەڕی چوارەمی دانوستانەکانی واشنتن و تاران رۆژی دووشەممە 5ـی ئایار لە رۆمای پایتەختی ئیتاڵیا بەڕێوەدەچێت.
ئەمەریکا و ئێران تاوەکوو ئێستا سێ جار بۆ گفتوگۆکردن لەبارەی پرۆگرامی ئەتۆمی ئێران کۆبوونەتەوە کە دوو لە کۆبوونەوەکان لە مەسقەتی پایتەختی عومان و کۆبوونەوەیەکیش لە رۆمای پایتەختی ئیتاڵیا بووە.
دۆناڵد ترەمپ، سەرۆکی ئەمەریکا رایگەیاندووە، ئامانجی لەو دانوستانانە ئەوەی رێگە نەدات ئێران بە هیچ شێوەیەک دەستی بە چەکی ئەتۆم رابگات و هەرەشەی ئەوەشی کردووە، ئەگەر ئێران رێککەوتنیان لەگەڵ نەکات، بژاری سەربازی بەکاردەهێنن و دەشڵێت؛ "بۆردومان دەکرێن، بە جۆرێک کە هەرگیز بۆردومانی ئاوا رووی نەدابێت".
کۆمێنت (0)
تا ئێستا هیچ کۆمێنتێک نەکراوە.