Erbil 14°C پێنجشەممە 03 نیسان 23:05

پارێزگاری دهۆك لەبارەی رووداوەكەی ئەمڕۆ لە كاتی بەڕێوەچوونی جەژنی ئەكیتۆ روونكردنەوە دەدات

کوردستان TV
100%

پارێزگاری دهۆك رایگەیاند كە بەتوندی ئیدانەی رووداوی هێرشەكەی ئەمڕۆی سەر هاووڵاتییانی كریستیان لە كاتی بەڕێوەچوونی جەژنی ئەكیتۆ دەكەن و جەختیشی كردەوە كە هێرشكارەكە دەستگیركراوە و لێكۆڵینەوەی لەگەڵدا دەكرێت.

پەیامنێری (كوردستان تیڤی) لە دهۆك لەبارەی رووداوەكە رایگەیاند: دوای نیوەڕۆی ئەمڕۆ سێشەممە لە كاتی بەڕێوەچوونی ئاهەنگی جەژنی ئەكیتۆ لە پارێزگای دهۆك، كەسێك بە چەقۆی ساتوور هێرشی كردە سەر هاووڵاتییان و لە ئەنجامدا دوو هاووڵاتی كریستیان بریندار بوون.

راشیگەیاند: هێرشكارەكە بەڕەگەز سوورییە و لەلایەن هێزە ئەمنییەكانی پارێزگای دهۆكەوە دەستگیركراوە.

عەلی تەتەر پارێزگاری دهۆك لە كۆنگرەیەكی رۆژنامەوانیدا لەبارەی رووداوەكە رایگەیاند: ئەمڕۆ رووداوێكی ناخۆش رووی دا و تاوانبارێك هەوڵی زیانگەیاندن و كوشتنی دابوو لە كاتی بەڕێوەچوونی ئاهەنگی جەژنی ئەكیتۆی كریستیانەكان.

راشیگەیاند: تاوانبارەكە لە شوێنی رووداوەكە لەلایەن هێزە ئەمنییەكانەوە دەستگیركراوە، ئێستاش لێكۆڵینەوەی لەگەڵ دەكرێت و دواتر ئەنجامی لێكۆڵینەوەكان بۆ رای گشتی بڵاو دەكرێتەوە.

هەروەها رایگەیاند: بە توندی ئیدانە و پرۆتستۆی ئەم كردەوە نامرۆڤانە دەكەین.

عەلی تەتەر ئاماژەی بەوەش دا: تاوانێكی لەمجۆرە، كاریگەری لەسەر پێكەوەژیانی ئاشتییانەی پێكهاتەكان لە هەرێمی كوردستان ناكات، چونكە پێكەوەژیان لە هەرێمی كوردستان مێژووییە و رەگی لەنێو دابونەریتی ئێمەدا چووەتە خوارەوە.

جەختیشی كردەوە كە وەك حكوومەتی هەرێمی كوردستان بە هەموو شێوەیەك بەرگریی لە پێكهاتەكان لە كریستیان و ئێزیدی و سریان و كلدان و ئاشووری و ئەرمەن و ئەرتۆدۆكس و خوشك و برایانی توركمان و عەرەب دەكەن و وەك چاوی خۆیان دەیپارێزن.

پەیامنێری (كوردستان تیڤی) لەبارەی رەوشی تەندروستی بریندارەكان رایگەیاند: بەهۆی رووداوەكە دوو كەس بریندار بوون، یەكێكیان ئافرەتێكی تەمەن 65 ساڵە و لە ئەنجامی رووداوەكە زیان بەر سەری كەوتووە، هەرچەندە خوێنبەربوون لە سەری دروسبووە، بەڵام تەندروستی جێگیرە و پێویستی بە ئەنجامدانی نەشتەرگەری نییە و ئێستا لە نەخۆشخانە لەژێری چاودێری پزیشكیدایە.

سەبارەت بە برینداری دووەمیش، ئاماژەی بەوەدابوو كە گەنجێكی تەمەن 25 ساڵە و زیانێكی كەم بەر سەری كەوتووە و تەنیا سەری شكاوە و پێویستی بە دوورینەوە هەیە، ئەویش تەندروستی جێگر و باشە.

کوردستان

کۆمێنت (0)

تا ئێستا هیچ کۆمێنتێک نەکراوە.

وەڵام بدەوە وەک میوان

دەتەوێت ئاگانامەکان وەربگریت؟
بمێنەوە لەگەڵ نوێترین هەواڵ و ڕووداوەکانمان.