ڕێكخراوی كۆچی نێو ده‌وڵه‌تی سه‌ر به نەتەوە یەکگرتووەکان بڵاوی کردووەتەوە، تەنها لە ساڵی 2024 هەشت هەزار و 939 کۆچبەر لە ڕێگەی کۆچی نا یاسایی بۆ وڵاتانی ئه‌ورووپی ، گیانیان له ده‌ست داوه ، ئه‌وه‌ش مایه‌ی نیگه‌رانی قووڵه و په‌ڵه‌یه‌كه بۆ نێوچاوانی وڵاتانی ئه‌ورووپی له‌ڕووی مافی مرۆڤه‌وه .
نه‌ته‌وه‌یه‌كگرتووه‌كان له بڵاوكراوه‌كه‌یدا كه زۆربه‌ی میدیا جیهانییه‌كان به بایه‌خه‌وه بڵاویان كردووه‌ته‌وه ڕایگه‌یاندووه ، مه‌زه‌نده ده‌كه‌ین ژماره‌ی گیان له‌ده‌ستدانی كۆچبه‌ران زۆر زیاتر بێت له‌وه‌ی كه ئێمه به نیگه‌رانییه‌وه بڵاوی ده‌كه‌ینه‌وه ، چونكه كۆچبه‌ری زۆر هه‌یه كه ناوی تۆمار نه‌كراوه و ناسنامه‌ی دیار نییه كه خه‌ڵكی چ وڵاتێكه .
ئه‌وه‌ش خراوه‌ته‌ڕوو ،له ساڵی 2024 زۆرینه‌ی گیان له‌ده‌ستدانی كۆچبه‌ران له كه‌ناراوه‌كانی ئیتالیا و نۆكه‌ندی ئینگلیز و ده‌ریای ناوه‌ڕاست بوونه ، ئه‌وه‌ش گومان ده‌خاته سه‌ر ڕۆڵی هێزه ده‌ریاییه‌كانی ئه‌و وڵاته ئه‌ورووپیانه، به‌تایبه‌تی فه‌ره‌نسا و به‌ریتانیا و ئه‌ڵمانیا و یۆنان و توركیا كه وه‌كو پێویست به ته‌نگ ڕزگاركردنی ژیانی كۆچبه‌رانه‌وه نه‌چوونه .
له ئاماره‌كه‌ی نه‌ته‌وه‌یه‌كگرتووه‌كاندا ئه‌وه‌ش هاتووه ، ئه‌و كۆچبه‌رانه‌ی كه گیانیان له‌ده‌ست داوه زیاتر خه‌ڵكی ئه‌فریقا و لیبیا و سووریا و عێراق و وڵاتانی ڕۆژهه‌ڵاتی ناوه‌راست بوونه كه له ده‌ستی نادادی و ناجێگیری دۆخی سیاسی و ئابووری كۆچیان كردووه .
نه‌ته‌وه‌یه‌كگرتووه‌كان به پێویستیشی زانیووه له ساڵی 2025دا وڵاتانی ئه‌ورووپی ده‌رچه‌یه‌كی یاسایی بدۆزنه‌وه بۆ چاره‌سه‌رێكی بنه‌ڕه‌تی بۆ كۆچبه‌ران تاكو چیتر كۆچبه‌ران ناچار نه‌بن ڕێگای مه‌رگ بگرنه به‌ر .
کۆمێنت (0)
تا ئێستا هیچ کۆمێنتێک نەکراوە.