بەردی بناغەی گەورەپرۆژەیەكی ئاوەڕۆ بە گوژمەی 6 ملیار دینار لە شەقامی كەركووك تا كەندی قەتەوی دانرا

بە ئامادەبوونی ساسان عەونی، وەزیری شارەوانی و گەشتوگوزار و ئومێد خۆشناو، پارێزگاری هەولێر بەمەبەستی كەمكردنەوەی مەترسییەكانی لافاو و باشتركردنی سیستەمی ئاوەڕۆ، بەردی بناغەی گەورەپرۆژەی دروستكردنی ئاوەڕۆی سندووقی لە شەقامی كەركووك لە نزیك شووقەكانی شەهیدان لە گردەڕەشە تا كەندی قەتەوی لە هەولێر دانرا.
ئەو پرۆژەیە ئەمڕۆ سێشەممە 24/12/2024 لە ڕێوڕەسمێكدا لەژێر چاودێری وەزیری شارەوانی و گەشتوگوزار و پارێزگاری هەولێر، بە ئامادەبوونی بەڕێوەبەری گشتیی ئاو و ئاوەڕۆ و جێگری پارێزگار و سەرۆكی شارەوانیی هەولێر و بەڕێوەبەری ئاوەڕۆی هەولێر و ژمارەیەك فەرمانگەی دیكەی خزمەتگوزاری بە گوژمەی (6 ملیار و 192 ملیۆن دینار) لەسەر بودجەی وەزارەتی شارەوانی و گەشتوگوزار كەوتە بواری جێبەجێكردنەوە و وەزیری شارەوانی و گەشتوگوزار و پارێزگاری هەولێریش بۆ میدیاكان تیشكیان خستە سەر گرنگیی پرۆژەكە بۆ شاری هەولێر.
سەرەتا ساسان عەونی، وەزیری شارەوانی و گەشتوگوزار سەبارەت بە گوژمەی پرۆژەكە ڕایگەیاند: گوژمەی پرۆژەی دروستكردنی ئاوەڕۆی سندووقی لە شەقامی كەركووك نزیك گردەڕەشە تا كەندی قەتەوی، زیاتر لە 6 ملیار دینارە و لەسەر بودجەی وەزارەتی شارەوانی و گەشتوگوزار جێبەجێ دەكرێت و ماوەی 450 ڕۆژی تەقویمی بۆ دیاریكراوە كە بە قەبارەی جیاواز جێبەجێ دەكرێت و مەمهۆڵ و كەناڵی كراوەشی تێدایە.
هەروەها سەبارەت بە بەردەوامی پرۆژە خزمەتگوزارییەكانی حكوومەت، ساسان عەونی ڕایگەیاند: لەژێر ڕێنمایی و ڕاسپاردەكانی جەنابی سەرۆكی حكوومەتی هەرێمی كوردستان ڕێزدار مەسرور بارزانی، پرۆژەكانی حكوومەت بەردەوام دەبن و لە هەر شوێنێك كە پێویست بە خزمەتگوزاری و كاری زیاتر هەبێت، سەرەڕای ئەو بارە نائاساییەی كە حكوومەتی هەرێمی كوردستان لەڕووی داراییەوە تێیدایە، بەڵام پرۆژە و خزمەتكردنی هاووڵاتییان بەردەوامن.
دواتر ئومێد خۆشناو، پارێزگاری هەولێر بۆ میدیاكان قسەی كرد و باسی لە گرنگیی پرۆژەكە بۆ شاری هەولێر و سنوورەكە كرد و ڕایگەیاند: ئەمڕۆ زۆر دڵخۆشین كە لە ژێر چاودێری و بەئامادەبوونی وەزیری شارەوانی و گەشتوگوزار بەردی بناغەی ئەو پرۆژەیە لە شاری هەولێر دادەنێین كە بەشێكە لە خواستی خەڵكی ناوچەكە و بەشێكیشە لە پلانەكانی حكوومەتی هەرێمی كوردستان بۆ كەمكردنەوەی مەترسییەكانی لافاو و چارەسەركردنی ئاستەنگی هاوتوچۆ لە كاتی بارانباریندا. پارێزگاری هەولێر گوتیشی: ئەو پرۆژەیە لەسەر بودجەی وەزارەتی شارەوانی و گەشتوگوزار بە گوژمەی زیاتر لە 6 ملیار دینار جێبەجێ دەكرێت، هەروەها ئومێد خۆشناو پارێزگاری هەولێر دەستخۆشی لە تیمەكانی بەڕێوەبەرایەتیی گشتیی ئاو و ئاوەڕۆ و ئاوەرۆی هەولێر و سەرۆكایەتیی شارەوانیی هەولێر و تیمی پارێزگا و فەرمانگەكانی تر كرد بۆ كاركردن لەو پرۆژەیە و هیوای خواست كە لە ماوەی دیاریكراوی خۆیدا تەواو بكرێت.
دواتر ساسان عەونی، وەزیری شارەوانی و گەشتوگوزار و ئومێد خۆشناو، پارێزگاری هەولێر گفتوگۆیان لەگەڵ دانیشتووانی سنوورەكە كرد و بەدواداچوونیان بۆ كێشە و گرفت و داواكاری هاووڵاتییان كرد و جەختیان لەسەر چارەسەركردنی كێشەكان و كاركردن لەسەر داواكارییەكانیان كردەوە بۆ زیاتر خزمەتكردنی دانیشتووانی ئەو سنوورە فراوانەی هەولێر.