سوپای ئیسڕائیل ئەمڕۆ یەكشەممە كوشتنی 20 فەرماندەی دیكەی حزبوڵای لە بۆردومانەكانی دوێنێی بەیرووتی پایتەختی لوبنان راگەیاند، لەو بۆردومانەی كە حەسەن نەسڕوڵای ئەمینداری گشتیی حزبەكە هاتە كوشتن.
سوپای ئیسڕائیل رایگەیاند: لە بۆردومانی فڕۆكە جەنگییەكانمان لە رۆژی هەینی رابردوو بۆ سەر باڵەخانەی بەڕێوەبەرایەتی هەواڵگری، دوو لە گرینگترین سەركردەكانی حزبوڵا كە ئەوانیش بریتی بوون لە حەسەن نەسڕوڵا ئەمینداری گشتیی حزبوڵا و عەلی كەركی فەرماندەی سەربازی حزبوڵا كوژران.
راشیگەیاند: جگە لە نەسڕوڵا و كەركی، هەروەها لە بۆردومانەكان 20 فەرماندە و ئەندامی دیكەی حزبوڵا كوژراون كە لە كاتی بۆردومانەكەدا لەنێو باڵەخانەكەدا بوون.
سوپای ئیسڕائیل ناوی هەندێ لەو فەرماندە و ئەندامانەی حزبوڵاشی ئاشكرا كرد كە لە بۆردومانەكاندا كوژران، ئەوانیش بریتین لە: ئیبراهیم حوسێن سەرۆكی پاسەوانەكانی نەسڕوڵا، سەمیر تۆفیق راوێژكاری سەربازی نەسڕوڵا، عەبدولئەمیر محەمەد سەرۆكی یەكەی بنیاتنانی حزبوڵا، عەلی نایف بەرپرسی رێكخستنی حزبوڵا و چەندانی دیكەش.
کۆمێنت (0)
تا ئێستا هیچ کۆمێنتێک نەکراوە.