پێنج هۆكاری تەندروستی كە دەبنە هۆی ئەوەی بەدەست كەمخەوییەوە بناڵێنیت؟!

ڕەنگە ناوبەناو تووشبوون بە كەمخەوی بێ ئەوەی هیچ كێشەیەكی جددی دروست بكات ئاسایی بێت ،بەڵام بۆ هەندێك كەس كەمخەوی بۆ چەند مانگێك یان تەنانەت ساڵانێك بەردەوام دەبێت. هەرچەندە كەمخەوی بەربڵاوە، بەڵام هەمیشە ڕوون نییە هۆكارەكەی چییە.
لەوبارەیەوە ڕاپۆرتێكی تەندروستی كە لەلایەن "هارڤارد هێڵت"ەوە بڵاوكراوەتەوە چەند كێشەیەكی تەندروستی دەخاتەڕوو كە دەبنە هۆی  كەمخەوی كە بریتییە لە:
شەكرە..
نەخۆشی شەكرە نەخۆشییەكی مەترسیدارە، بەڵام زۆر كەس بەبێ ئەوەی بزانن لەگەڵ ئەو حاڵەتەدا دەژین، بەو پێیەی دەكرێت نیشانەكانی ورد بن.
بەگوێرەی ڕاپۆرتەكە، ئەو كەسانەی نەخۆشی شەكرەیان هەیە ڕەنگە تووشی كێشەیەك ببن كە خەوتنیان قورستر دەكات.
ئەم گرفتانە بریتین لە ئارەقكردنەوەی شەوانە و پێویستی زۆر بە میزكردن.
سستبوونی دڵ..
سستبوونی دڵ كاتێك ڕوودەدات كە دڵ ناتوانێت خوێن بە باشی پەمپ بكات.زیاتریش تووشی كەسانی بەساڵاچوو دەبێت، بەڵام لە هەندێك حاڵەتدا دەتوانێت كاریگەری لەسەر گەنجانیش هەبێت. حاڵەتێكە وردە وردە دەردەكەوێت و دەتوانێت ببێتە هۆی كۆبوونەوەی شلە لە دەوری سییەكان.ئەمەش دەبێتە هۆی ئەوەی نەخۆشەكان لە شەودا لە خەو هەڵسێن و هەست بە تەنگەنەفەسی بكەن.زانایانی زانكۆی هارڤاردیش پێشنیاری بەكارهێنانی سەرین دەكەن بۆ بەرزكردنەوەی بەشی سەرەوەی جەستە.نیشانە سەرەكییەكانی سستبوونی دڵیش بریتین لە هەناسە تەنگی و هەستكردن بە ماندوێتی و بێهۆشبوون و ئاوسانی پاژنەی پێ.هەروەها نیشانەكان دەتوانن بە خێرایی یان وردە وردە لە ماوەی چەند هەفتەیەك یان چەند مانگێكدا گەشە بكەن.
هەوكردنی جومگەكان..
ئەو دەرمانانەی بۆ چارەسەری هەوكردنی جومگەكان بەكاردەهێنرێن زۆرجار دەبنە هۆی كەمخەوی.ئەگەر هەوكردنی جومگەكانت هەیە و كێشەی خەوتنت هەیە، لەوانەیە پزیشكەكەت پێشنیاری ئەوە بكات كە ئەسپرین یان دەرمانێكی دژە هەوكردن ڕاستەوخۆ پێش خەوتن بخۆیت بۆ كەمكردنەوەی ئازار و ئاوسانی.
میزكردنی شەوانە..
حاڵەتێكە كە وا دەكات شەوانە پێویستت بە میزكردنی زۆر بێت.ئەم حاڵەتەش دەبێتە هۆی ئەوەی كەسەكە بەلایەنی كەمەوە دوو جار لە شەودا لە خەو هەڵسێت، بەڵام لە حاڵەتە توندەكاندا لەوانەیە كەسەكە تا 5 یان 6 جار لە خەو هەڵسێت.
نەخۆشی غودەی دەرەقی..
ڕژێنی غودەی دەرەقی زۆر چالاك دەتوانێت ببێتە هۆی كێشەی خەو.نەخۆشییەكەش دەبێتە هۆی ئەوەی كە كۆئەندامی دەمار زۆر هان بدرێت.نیشانەكانی ئەم حاڵەتەش ناڕوونن.