سه‌رۆكی گشتی پارتی سه‌عاده‌ت، ته‌مه‌ل كه‌ره‌مۆڵائۆغڵو له میانی گوتارێكدا رایگه‌یاند كه پارته‌كه‌ی وه‌كو پرنسیب له دژی داخستنی پارته سیاسییه‌كانه چونكه له رابردوودا توركیا ئه‌مه‌ی تاقی كردووه‌ته‌وه و هیچ ده‌ستكه‌وتی نه‌بووه.
ته‌مه‌ل كه‌ره‌مۆڵائۆغڵو له به‌رده‌وامی گوتاره‌كه‌یدا باسی له پرسی ته‌عین كردنی قه‌یووم بۆ شاره‌وانییه‌كانی هه‌ده‌په له شاره كوردییه‌كان كردووه ورایگه‌یاندووه كه ته‌عین كردنی قه‌یووم یاسایی نییه و پێویسته له‌و شارانه‌ی كه قه‌یووم بۆ شاره‌وانییه‌كانیان ته‌عین كراوه دووباره هه‌ڵبژاردنی شاره‌وانییه‌كان بكرێته‌وه و رێز له ئیراده و بڕیاری ده‌نگده‌ر بگیردرێت.
ناوبراو له‌به‌رده‌وامی گوتاره‌كه‌یدا باسی پرسی كوردی كردووه و رایگه‌یاندووه كه پرسی هه‌ر گرنگ و ئاڵۆزی توركیا پرسی كورده، ئه‌م پرسه به هه‌ڕه‌شه و توندوتیژی چاره‌سه‌ر ناكرێت و بۆ چاره‌سه‌ر كردنی پێویستی به دیالۆگ و له‌یه‌ك تێگه‌یشتن هه‌یه.
ئه‌رده‌لان گۆران
کۆمێنت (0)
تا ئێستا هیچ کۆمێنتێک نەکراوە.