پۆلیسی دارستان و ژینگەی پارێزگای سلێمانی له ڕاگه‌ێندراوێكدا ڕایگه‌یاند: قائیمقامی دوکان سەردانی ماڵی کارمەندەکەی دارستانی کرد لە بناری چیای کۆسرەت لە ناحییەی خدران کارمەندەکەی پۆلیسی دارستان و ژینگە بە نۆ تەقەڵ برینەکەی دەدورنەوە .
له ڕاگه‌ێندراوه‌كه‌دا هاتووه:
ئەفسەرو ھاوڵاتیەکان بە نایاسای سەرقاڵی ڕاوی ماسی بوون لە دەریاچەی دوکانداو کارمەندەکەی دارستانیش لەکاتی ئەرکدا بووە . شەوی ڕابردوو چەند ئەفسەرێک لە پۆلیسی ناوخۆو پۆلیسی بەرەنگاربوونەوەی توندوو تیژی لەگەڵ چەند ھاوڵاتییەک لە دەریاچەی دوکاندا بە نایاسای ڕاو دەکەن .
کاتێکیش دوو کارمەندی بنکەی پۆلیسی دارستان و ژینگەی خدران کە لەکاتی ئەرکدا بوون و لە نزیک کاتژمێر ١٢ی شەو دەچنە لایان تا بزانن ڕاو چین یان گەشتیار ... ئەفسەرەکان و ھاوڵاتییەکانیش دەڵێن بۆ گەشت ھاتوین .بەڵام کاتێک دوو کارمەندەکە کەلوپەلی ڕاوکردن دەبینن و دەیانەوێت دەستی بەسەردا بگرن .ھێرش دەکەنە سەریان و کارمەندێکیان بریندار دەکەن .
بەیانی ئەمڕۆش سیروان سرحد قائیمقامی قەزای دوکان بە ھاوڕێیەتی بەڕێوەبەری ناحییەی خدران و عەقید ئه‌حمه‌د بەڕێوەبەری بەشی پۆلیسی دارستان و ژینگەی دوکان و و بەڕێوەبەری ئاسایاشی ناحییەکە و چەند ئەفسەرێکی بەشی پۆلیسی دارستان و ژینگە دەچنە ماڵی کارمەندە بریندار بووەکە .
لە بارەی ڕووداوەکەوە قائیمقامی دوکان ڕایگەیاند : لە نزیکەوە چاودێری دۆسییەکە دەکەن لە پۆلیس و بەڕێوەچوونی ڕێکارە یاساییەکانی ڕووداوەکە ، وتیشی ئەوکارمەندە یەکێک بووە لە کارمەندە نمونەیەکان و لەکاتی ئەرکدا ھێرشی کراوەتە سەر . وە ڕاشیگەیاند وێڕای سوپاس و دەستخۆشیان لە کارمەندەکە بۆ جێبەجێ کردنی ئەرکەکەی و پاڵپشتی خۆیان بۆ دەربڕیوە.
وە بەکەسوکارەکەشیان ڕاگەیاندووە دۆسیەکە لە دادگایەو چاوەڕوانی دەرەنجامی ڕێکارە یاساییەکان بن .
جێی باسە ساڵانە لەکاتی قەدەغەی ڕاوی ماسی چەندین ھاوڵاتی بە نایاسای ڕاو دەکەن و لە ناویشیاندا چەندین بەرپرس و ئەفسەر ھەن .
وە کارمەندانی دارستان و ژینگەش ھەموو ھەوڵێک دەدەن تا ڕێگری بکەن لە سەرپێچی کاران و مانەوەی سامانی ماسی. لەسەر ئەم ڕووداوەش جگە لە ڕێکارە یاساییەکان بەرامبەر تاوانباران ، پێویستە لایەنە پەیوەندیدارەکان و بەڕێوەبەرایەتی و وەزارەتی ناوخۆ لێپێچینەوە لە ئەفسەرەکان بکەن .
راگەیاندراوی پۆلیسی دارستان و ژینگەی پارێزگای سلێمانی
کۆمێنت (0)
تا ئێستا هیچ کۆمێنتێک نەکراوە.