ئه‌م ئێواره‌یه‌ مانچسته‌ر سیتی ده‌بێته‌ میوانی لیسته‌ر سیتی

له‌ هه‌فته‌ی سییه‌می خولی یانه‌كانی ئینگلته‌راو له‌ یاری لوتكه‌دا، كاتژمێر 7:30ی خوله‌كی ئه‌مرۆ ئێواره‌ به‌كاتی هه‌ولێر، یانه‌ی مانچسته‌رسیتی ده‌بێته‌ میوانی یانه‌ی لیسته‌رسیتی.
 مان سیتی به‌ كۆكردنه‌وه‌ی حه‌فتاویه‌ك خاڵ له‌ پێشه‌نگی ڕیزبه‌ندی یانه‌كان دایه‌و به‌ جیاوازی چوارده‌ خاڵ له‌پێش مانچسته‌ریونایتدی نزیكترین ڕكابه‌ری دێت و به‌ره‌و مسۆگه‌ركردنی نازناوی خوله‌كه‌ به‌ شێوه‌ی پێشوه‌خت هه‌نگاو ده‌نێت، لیسته‌رسیتیش به‌ په‌نجاوشه‌ش خاڵ له‌ پله‌ی سێیه‌می ڕیزبه‌ندی دێت و هه‌وڵ ده‌دات له‌م وه‌رزه‌دا، یه‌كێك له‌ پله‌كانی پێشه‌وه‌و گه‌یشتن بۆ ململانێكانی وه‌رزی داهاتووی قۆناغی كۆمه‌ڵه‌كانی چامپیۆنس لیگ مسۆگه‌ربكات، له‌م وه‌رزه‌دا لیسته‌رسیتی به‌ پشت به‌ستن به‌ تواناكانی هه‌ردوو گۆڵكاره‌كه‌ی، جیمی ڤاردی و كیلیچی ئیهیاناچۆی نێجیری ئاستێكی به‌رزی پێشكه‌شكردووه، له‌ قۆناغی یه‌كه‌می پرێمه‌رلیگ، لیسته‌رسیتی سه‌ركه‌وتنێكی گه‌وره‌ی له‌ یاری به‌رامبه‌ر مان سیتی به‌ده‌ستهێناو له‌ ده‌ره‌وه‌ی یاریگای خۆی به‌ پێنج گۆڵ به‌رامبه‌ر به‌ دوو گۆڵ له‌ میوانداره‌كه‌ی برده‌وه.
 له‌ دووه‌م یاری لوتكه‌ی ئه‌م هه‌فته‌یه‌ی خولی یانه‌كانی ئینگلته‌راو له‌ كاتژمێر ده‌ی ئه‌م شه‌و به‌كاتی هه‌ولێر، یانه‌ی ئارسناڵ میوانداری یانه‌ی لیڤه‌رپولی پاڵه‌وانی وه‌رزی ڕابردووی خوله‌كه‌ ده‌كات.
 هه‌ردوو یانه‌ له‌م وه‌رزه‌دا ئاستیان باش نیه، ئارسناڵ به‌ چلودوو خاڵ له‌ پله‌ی نۆیه‌می ڕیزبه‌ندی دایه‌و لیڤه‌رپولیش به‌ چل وشه‌ش خاڵ له‌ پله‌ی حه‌وته‌می ڕیزبه‌ند دێت و ئومێدی پارێزگاریكردن له‌ نازناوی خوله‌كه‌ی نه‌ماوه، له‌ یاریه‌كی دیكه‌ی هه‌مان گه‌ڕی خولی ئینگلته‌راو له‌ كاتژمێر دوو و سیی خوله‌كی دوای نیوه‌ڕۆی ئه‌مرۆ  یانه‌ی چێڵسی میوانداری یانه‌ی وێست برۆمیچ ئه‌لبیۆن ده‌كات .