لە ناوچەی "ئیبراهیمییە" لە شاری حیللە، جووتیارانی عێراقی سەرقاڵی یەکێک لە کۆنترین و گرنگترین وەرزەکانن، ئەویش وەرزی بڕینەوە و کۆکردنەوەی خورمایە. وێنەکان جووتیارێکی عێراقی پیشان دەدەن کە بە لێهاتووییەکی زۆرەوە دەچێتە سەر دارخورما بەرزەکان بۆ چنینەوەی بەروبوومەکە.
دوای بڕینەوەی، خورماکان لە سەبەتەی گەورەدا کۆدەکرێنەوە و دەگوازرێنەوە بۆ ناوەندەکانی کۆکردنەوە. لێرەدا جووتیارن خەریکی پۆلێنکردن و ئامادەکردنی خورماکانن بۆ بازاڕەکانی ناوخۆ و هەناردەکردن بۆ دەرەوەی وڵات.
دیمەنە ئاسمانییەکان چڕی و جوانیی باخەکانی دارخورما لە ناوچەی ئیبراهیمییە پیشان دەدەن. عێراق بە یەکێک لە وڵاتە سەرەکییەکانی جیهان دادەنرێت بۆ بەرهەمهێنانی خورما، و شاری حیللەش (بابل) ناوەندێکی گرنگی ئەم سامانە نیشتمانییەیە.
خورما تەنها بەروبوومێکی کشتوکاڵی نییە، بەڵکو بەشێکە لە ناسنامە و کولتووری عێراق. ساڵانە لە سەرەتای مانگی ئەیلوولدا، ئەم چالاکییە دەبێتە دیمەنێکی باوی ناوچە کشتوکاڵییەکان و سەرچاوەی بژێوی هەزاران خێزانە.
کۆمێنت (0)
تا ئێستا هیچ کۆمێنتێک نەکراوە.