Erbil 15°C ھەینی 29 ئازار 09:32

ئێزدى د كابینا نه‌هێدا

کوردستان TV
100%

جەعفەر سمۆ

ل ده‌ستپێكا ده‌ست بكاربوونا كابینا نه‌هێ یا حكوومه‌تا هه‌رێما كوردستانێ ل 10-7-2019 ب سه‌رۆكاتیا مەسرور بارزانى، كارناما حكوومه‌تێ هاته‌ راگه‌هاندن، د چه‌ندین خالێن كارناما ناڤبریدا ئاماژه‌ ب مافێن پێكهاتان هاته‌ كرن، كو گرنگترین ئه‌و خاله‌ژى دووپاتكرنه‌ ل پرۆسیسا پێكڤه‌ژیانا ئاشتییانه‌ دناڤبه‌را هه‌موو پێكهاتێن گه‌لێ كوردستانێدا كو هه‌موو پێكهات ب مافێن خۆ شاد ببن.

دڤێ نڤسینا خۆدا دێ پێداچۆنه‌كا بله‌ز د ئیدار و سیاسه‌تا حه‌كیمانه‌ یا مەسرور بارزانى سه‌رۆكێ حكوومه‌تا هه‌رێما كوردستانێ دده‌رهه‌قا پێكهاتا ئێزدیدا كه‌ین وه‌كو پێكهاته‌كى ره‌سه‌ن ژ گه‌لێ كوردستانێ كو ددرێژاهیا مێژوویێدا تووشى گه‌له‌ك سته‌م و زۆرداریێ بووین.

هه‌ستكرن ب ئێش و ئازارێن ئێزدیان به‌شه‌كى سه‌ره‌كى یێ پلانا سه‌رۆكێ حكوومه‌تێ بوویه‌ و ئه‌ڤ چه‌نده‌ دپێنگاڤ و خزمه‌تا وى یا به‌رده‌وام بۆ ڤى پێكهاته‌یدا بۆ مه‌ دووپات دبت، له‌ورا ره‌نگه‌ سه‌رۆكێ حكوومه‌تێ دیتنه‌كا به‌رفره‌ه بۆ پێشه‌رۆژا ئێزدیان و گرنگیا مان و هه‌بوونا وان دڤێ خاكێدا هه‌یه‌.

ب شێوه‌یه‌كى گشتى، پێكهاتێن گه‌لێ كوردستانێ و ب تایبه‌تژى ئێزدیان تا راده‌یه‌كى باش هه‌ست ب هه‌بوون و به‌رپرسایه‌تیێ دكابینا نه‌هێدا كریه‌ و ئه‌ڤ چه‌نده‌ژى به‌شه‌كه‌ ژ سه‌رفه‌رازیا كوردستانێ وه‌كو هه‌رێمه‌كا فره‌ئایینى و نه‌ته‌وه‌ى، ل سه‌ر ئاستێ پله‌ و پۆستان ئێزدیان بریكا، راوێژكار، رێڤه‌به‌رێن گشتى، رێڤه‌به‌رێن داموده‌زگایان هه‌ینه‌ و رۆله‌كى كارا دگێرن، ئه‌ڤه‌ دده‌مه‌كیدایه‌ كو هیڤیێن ئێزدیان مه‌زنترن و دخوازن پتر رۆلێ خۆ دناڤ سازیێن حكومه‌تێدا بگێرن، بۆ هندێ خۆ ب خودانێ ڤى خاكى بزانن و خۆ نه‌بینن مێڤان ل ڤى وه‌لاتى.

ل سه‌ر ئاستێ په‌رستگه‌ها لالش وه‌كو مه‌زنترین په‌رستگه‌ها پیرۆزا ئێزدیان ل سه‌رتاسه‌رى جیهانێ كو د جه‌رگێ كوردستانێدایه‌، ب پشته‌ڤانیا سه‌رۆكێ حكوومه‌تێ چه‌ندین پرۆژێن گرنگ و ستراتیجى لێ هاتینه‌ ئه‌نجامدان، مینا كاره‌با به‌رده‌وام، ئاڤ، جادا سه‌ره‌كى، ده‌روازه‌ ...هتد كو ئه‌ڤ چه‌نده‌ بوویه‌ جهێ دلخۆشیا ئێزدیان چونكى لالش مالا هه‌موو ئێزدییانه‌.

ل سه‌ر ئاستێ كه‌یسا جینۆسایدناساندنا ئێزدیان، مەسرور بارزانى ل گه‌ل كابینا خۆ یا نه‌هێ پێنگاڤێن جدى هاڤێتینه‌ بۆ هندێ ئه‌ڤا ب سه‌رێ ئێزدیان هاتى ل سالا 2014 وه‌كو جینۆساید بێته‌ ناسین و ئه‌ڤ پێنگاڤه‌ چ ل سه‌ر ئاستێ نافخۆیى چ ژى ل سه‌ر ئاستێ نێڤده‌وله‌تى، كاره‌كى مه‌زن ل سه‌ر هاتیه‌ ئه‌نجامدان، هه‌ولێن سه‌رۆكێ حكوومه‌تێ بۆ دانانا دادگه‌هه‌كا تایبه‌ت بۆ تاوانێن داعش ل هه‌رێما كوردستانێ، باشترین به‌لگه‌ بوو، لێ مخابن رێگریا حكوومه‌تا عیراقێ بوو ئه‌گه‌ر كو ئه‌ڤ دادگه‌ه نه‌ئێته‌ دانان و ب ڤێ یه‌كێ خه‌ونا هه‌موو تاكێن  ئێزدى بوو قوربانى سیاسه‌تا شۆفینى یا حكوومه‌تا عیراقێ.

سه‌باره‌ت ره‌وشا په‌ریشانا خه‌لكێ شنگال ل ناڤ كه‌مپاندا، هه‌وله‌ك هاته‌ دان بۆ رێكه‌فتنه‌كێ ل گه‌ل حكوومه‌تا عیراقێ ل ئوكتوبه‌را سالا 2020 و سه‌رۆكێ حكوومه‌تا كوردستانێ پێنگاڤێن باش هاڤێـتن بۆ هندێ هه‌ردوو حكومه‌تێن فیدرال و یا كوردستانێ ئیمزا ل سه‌ر رێكه‌فتنا شنگال بكه‌ن، دڤى بیاڤیدا ب مخابنیڤه حكوومه‌تێ عیراقێ نە هەر پشته‌ڤان نه‌بوو، به‌لكو رێگرى ل پرانیا خالێن ڤێ رێكه‌فتنێ كرن و تا نها یه‌ك خال ژ وێ رێكه‌فتنێ نه‌هاتیه‌ جیبه‌یكرن و دئه‌نجامدا خه‌لكێ شنگال دناڤا كه‌مپادا پترى هه‌شت سالایه‌ دژیانا ئاواه‌ریێدا دژین.

ل سه‌ر ئاستێ سازیێن ره‌وشه‌نبیرى یێن ئێزدیان ب تایبه‌تژى بنگه‌هێ لالش یێ ره‌وشه‌نبیرى و كۆمه‌لایه‌تى، كو ئه‌ڤ سازیه‌ مه‌زنترین سازیا ئێزدیایه‌ ل سه‌رتاسه‌رى جیهانێ و بۆ پتر پێشخستنا كار و خه‌باتا ڤى بنگه‌هى، مەسرور بارزانى گرنگیه‌كا تایبه‌ت ب هه‌بوونا ڤێ سازیێ دده‌ت و پشته‌ڤانیه‌كا به‌رده‌وام ل كار و خه‌باتا وێ دكه‌ت ژبه‌ركو ژسالا 1993 تا نها ڤى بنگه‌هى كارییه‌ به‌شه‌كى گرنگ یێ دیرۆك و فه‌لسه‌فه‌ و میتۆلوگۆیا ئێزدیان ساخ بكه‌ت، كەواته‌ پشته‌ڤانیكرن ل ڤێ سازیا گرنگ، دێ پتر ئێزدیان هان دده‌ت خزمه‌تا چاند و كلتۆرێ خۆ بكه‌ن.

مامۆستایێن ئایینى یێن هه‌موو پێكهاتان دئیدارا كابینا نه‌هێدا رێزه‌كا تایبه‌ت هه‌یه‌، ل ناڤا ئێزدیانژى هژماره‌كا كه‌سایه‌تیێن ئۆلى ژ جڤاتا رۆحانى تا قه‌ولبێژ و مجێوران رێزه‌كا مه‌زن د سیاسه‌تا حه‌كیمانه‌یا مەسرور بارزانیدا هه‌نه‌ و هه‌ر ژبه‌ر ڤێ رێزگرتنێ هاریكاریا وان به‌رده‌وام تێـته‌ كرن بۆ هندێ پتر بكارن خزمه‌تا ئۆل و ئایینێ خۆ بكه‌ن.

رێزگرتن ل پێكهاتان روویێ گه‌شێ گه‌لێ مه‌ ب جیهانا ئاشتخواز را پتر نیشان دده‌ت، له‌ورا تا نها  كوردستان ب مه‌لبه‌ندێ پێكڤه‌ژیان و هه‌ڤدووقه‌بولكرنێ تێته‌ ناسین و بوویه‌ نموونه‌یه‌ك بۆ هه‌رێمه‌كه‌ فره‌ئایین و فرەنه‌ته‌وه‌ ل ده‌ڤه‌رێ.

کوردستان

ڕیکلام

دەتەوێت ئاگانامەکان وەربگریت؟
بمێنەوە لەگەڵ نوێترین هەواڵ و ڕووداوەکانمان.