بو دەمەك درێژە حکومەتا ناڤەندیا کومارا ئێراقێ وەك کارتەك و فشارەكێ چەندین قەیرانێن ئابوری و سیاسی و دارایی دروست کرینە.
هەلبەت ئاریشێن حکومەتا هەرێمێ لگەل حکومەتا ئێراقێ نە بتنێ نەدانا موچەیی یان نە ڕەوانەکرنا بەشە بودجەیێ هەرێمێ یە وەك د دەستوری دا هاتی نڤێسین و پەسەند کرن، ئاریشەیێن کویرتر و دژوارتر یێن هەین، بەلێ ژ بەر کو دابەشکرنا موچەیی ڕاستەوخو گرێدای ژیانا خەلکێ یە ئەڤ بابەتە پتر دهێتە گەنگەشە کرن د ناڤ کومەلگەهی و میدیایێ دا.
قەیرانێن دەستکرد بو هەر وەلاتەکی ئەنجامێن خرابکەر ل دویڤ خوە هێلاینە بەلێ یا ئێراقێ ژ بەر کو وەلاتەکە خودان ژێدەرێن پەترولێ یە و فرە نەتەوەیە و مایتکرن و هێرشێن نیڤدەولەتی بەردەوامن لسەر مەترسیا وێ مەزنترە.
پشتی هاتنا گڕوپێن تیروری و داگیرکرنا چەندین جهێن ستراتیژی و ئەنجامدانا کوشتاران گەلەك زیان ل دویڤ خوە هێلاینە. بابەتێ پەیوەندیدار ب هەرێمێ ڤە بارا پتر قەیرانێن دەستکرد و سیاسی نە و ژ لایێ یاسایی ڤە چ بەهانە بو نینن.د سەردەمێ ڕزگارکرنا ئێراقێ ژ دکتاتوریێ کورد مەزنترین ڕوڵێ خوە دیت، ب هاتنا گڕوپێن توندڕەو دیسان ئێراقێ بێی کوردان نەشیا چ بکن سەڕەڕای ڤێ چەندێ دەمێ کوردا ڤیایی ڕاپرسیێ بکن حکومەتا ناڤەندی ب دژواری ئەڤ چەندە ڕەدکر تا وی ڕادەی گەفێن داگیرکرنێ کرن.
قەیرانا دارایی کو ئێك ژ ئاریشێن هلاویستی دناڤبەرا حکومەتا ناڤەندی و هەرێمێ یە هەر دەمەکێ ئێراقێ ڤیایی سەڕەڕای هەبوونا مادێن وێ د دەستوری دا ڕاوەستاندینە و کریە فشارەك بو ئامانجێن ئابوری.نەبوونا یاسایەکا بهێز و سەرکردێن خودان شیان د ناڤ سیاسەتا ئێراقێ دا ئەڤ ئاریشە کویرتر لێ کرینە.
دیسان هەبونا مایتێکرنا دولەتێن هەڤسوی ژی ئێراق پتر لاواز کریە تا وی ڕادەی سەڕەڕای هەبونا ژێدەرێن پەترولێ یێن زێدە د شیاندا نەبوویە خوەشگوزەرانیا خەلکێ باشتر لێ بکت. ئێراق بێی کیانێ هەرێما کوردستانێ نەشێت چ ئاریشێن خوە چارەسەر بکت و لگەل بەردەوامیا ئاریشا ئاریشە مەزنتر لێ دهێن.
ژ لایێ دی ڤە ئەگەر ئێراق سەڕبورێ ژ وەلاتێن دی نە وەرگرت ژ بلی قەیرانێن دارایی قەیرانێن مروڤی و نەهێنە چارەسەر کرن ل دویڤ دا دێ هێن. حکومەتا هەرێمێ ژی ب درویشمێ چاکسازی دەست بکار بوویە هەر ژ دەستپێکێ پێنگاڤێن بەرچاڤ هاڤێتینە و موکمکرنا پەیوەندیان ژی د ڤی چوارچوڤەی دا دهێتە هژمارتن و گەلەك ژ ئاریشەیان بەرەڤ چارەسەریێ برینە کو ئەنجامێن وێ د دەمێن داهاتی دا دێ دیار بن.
