وه‌لاتێ ئه‌لمانیا ل سه‌ر ئاستێ جیهانێ ئێكه ژ وان وه‌لاتێن زلهێزه د هه‌موو بیاڤان دا وه‌كو له‌شكه‌رى و ئابۆرى و پیشه‌سازى و چه‌ندین بیاڤێن دیتر ئه‌لمانیا و هه‌رێما كوردستانێ د چه‌ندین بیاڤان دا په‌یوه‌ندیێن بهێز هه‌نه.
حكومه‌تا هه‌رێما كوردستانێ ب سه‌رۆكاتیا نێچیرڤان بارزانى په‌یوه‌ندیێن هه‌رى باش و بهێز دگه‌ل حكومه‌تا ئه‌لمانیا درستكرینه و هه‌ر ئه‌ڤ په‌یوه‌ندییه بووینه ئه‌گه‌رێ هندێ كو ئه‌لمانیا د نه‌خوشترین بارودوخ دا پشتا هه‌رێما كوردستانێ به‌رنه‌ده‌ت هه‌ر بگره ژ هاتنا داعش و مه‌ترسیا وێ ل سه‌ر هه‌رێما كوردستانێ ئه‌لمانیا پشته‌ڤانیا كوردستانێ كر، وه‌كو فرێكرنا چه‌كى و راهێنانێن هه‌رى پێشكه‌فتى ب پێشمه‌رگه‌هێن قه‌هره‌مان كرن و نابیت ئه‌م وه‌كو ملله‌تێ كورد چ جاران چه‌كێ میلانۆ ژ بیر بكه‌ین كو روله‌كێ گرنگ و كاریگه‌ر هه‌بوویه د ئێكلاكرنا شه‌ران دا.
ئه‌لمانیا هه‌ڤالا رۆژێن سه‌خت و دژوار یا هه‌رێما كوردستانێ یا به‌رده‌وام، ئه‌و رۆژێن پیشمه‌رگه‌هێن قه‌هره‌مان داستانێن پردێ و سحێلا توماركرین پشكه‌كا وان قه‌هره‌مانیان بۆ پشته‌ڤانى و چه‌كێ پێشكه‌فتى یێ ئه‌لمانیا دزڤریت و ئه‌گه‌ر خیانه‌ت نه‌با چ جارا هه‌رێما كوردستانێ ته د كه‌فته د چ ته‌نگاڤیان دا.
دیسان ئه‌لمانیا مل ب ملێ فه‌ره‌نسا هه‌موو ده‌رگه‌هێن گرتین ڤه‌كرنه ڤه و چه‌ندین هاریكارى پێشكێشى كوردێن ئێزدى كرن و دیسان چه‌ندین رێكخراوێن مه‌زن وه‌كو (جی ئاى زێد) كو چه‌ندین پرۆژێن گرنگ یێ ئابۆرى و مرۆڤى پێشكێشى هه‌رێما كوردستانێ كرن.
دوماهیك سه‌ره‌دانا دبلۆماسى یا وه‌زیرێ ده‌رڤه یێ ئه‌لمانیا هایكۆ ماسى و كومبوونا وى دگه‌ل سه‌رۆكێ حكومه‌تێ نێچیرڤان بارزانى و ئه‌لمانیا ب چاڤه‌كێ مه‌زن به‌رێ خوه دده‌ته هه‌رێما كوردستانێ و چه‌ندین به‌رژه‌وه‌ندی دگه‌ل هه‌رێما كوردستانێ هه‌نه و ل داهاتى دێ چه‌ندین پرۆژێن وه‌ربه‌رهێنانێ یێ مه‌زن ل هه‌رێما كوردستانێ هه‌بن و دێ كومپانیێ مه‌زن سه‌ره‌دانا هه‌رێما كوردستانێ كه‌ن و كه‌رتێ تایبه‌ت به‌ره‌ڤ پێشڤه به‌ن.
یا گرنگه ژ بیرنه‌كه‌ین كو وه‌لاتێ ئه‌لمانیا ژى ئێكه ژ وان وه‌لاتان كو كار دكه‌ت ریفۆرمه‌كا مه‌زن د ناڤ هێزێن پێشمه‌رگه‌ى دا بكه‌ت بۆ هندێ پێشمه‌رگه ببیته هێزه‌كا ئێكگرتى و هه‌رده‌م حكومه‌تا هه‌رێما كوردستانێ ژى پشته‌ڤانا ڤى كارى یه و ل نێزیك دێ هه‌رێم گه‌هیته ئارمانجا خوه.
حكومه‌تا هه‌رێما كوردستانێ ل سه‌ر ئاستێ جیهانێ ب هندێ هاتیه نیاسین كو ئاشتى و ئارامى ل ده‌ڤه‌رێ به‌رقراكریه و رێگرى ل شه‌ره‌كێ مه‌زن كرییه پشتى 16ى ئۆكتۆبه‌رێ و دیسان ئه‌ڤ كارێ حكومه‌تێ هه‌رده‌م جهێ رێزێ بوویه ل جه‌م وه‌لاتێن وه‌كو ئه‌لمانیا و ئه‌و پێشوازییا مه‌زن یا حكومه‌تا هه‌رێما كوردستانێ ل پشكه‌كا مه‌زن یا ئاواره‌یان پتر جهـ و پێگه‌هێ هه‌رێما كوردستانێ ل سه‌ر ئاستێ جیهانێ بهێز كر.
ل دوماهیكێ یا گرنگه ئه‌م د گه‌شبین بى كو دێ هه‌رێما كوردستانێ پاشه‌رۆژه‌كا گه‌ش هه‌بیت هندی وه‌لاتێن وه‌كى ئه‌لمانیا پشته‌ڤانیا هه‌رێمێ بكه‌ن.
