خیانه‌تا 16ى ئكتۆبه‌رێ هه‌ر ب ته‌سلیمكرنا كه‌ركووكێ ب دووماهى نه‌هات، به‌لكو ده‌رفه‌تا وێ یه‌كێ ژى ب به‌غدایێ دا كو هه‌موو وان 13ى خالێن په‌رله‌مانێ ئیراقێ وه‌كو بریار ل دژى هه‌رێما كوردستانێ ده‌ركرین جێ ب جێ بكه‌ت، ژ وان دۆرپێچا و ئابوورى و گرتنا سنورێن خوه ل گه‌ل هه‌رێمێ و راوه‌ستاندنا گه‌شتێن نێڤ ده‌وله‌تى ل هه‌ردوو فرۆكخانه‌یێن هه‌ولێر و و سلێمانیێ و ره‌تكرنا هه‌رێما كوردستانێ ب ده‌سته‌لات و قه‌واره‌یێ خوه یێ سیاسى ڤه و گه‌له‌ك دۆرپێچین دى، لێ ئه‌ڤه هه‌موو نه‌شیان ئیراده‌یا وى خه‌لكى بشكێنن ئه‌وێن ب به‌لێ ده‌نگ ب ریفراندۆما سه‌رخوه‌بوونا كوردستانێ داى
بۆ ژناڤبرنا ڤێ كابینه‌یا حكومه‌تا هه‌رێمێ گروپێ خیانه‌تا 16ى ئكتۆبه‌رێ هه‌روه‌سا ب بێ كارى رانه‌وه‌ستان، به‌لكو هنده‌ك جاران ب تنێ و هنده‌ك جاران ل گه‌ل پارتێن وه‌كو گۆران و كۆمه‌ل و لیستا ههڤپهیمانى سه‌ره‌دانا به‌غدایێ كرن و پێگریا خوه ئێكپارچه‌ییا ئیراقولحه‌بیب دووپاتكررن، ره‌نگه ئه‌ڤ هه‌لوێسته هیچ كاریگه‌ریه‌كێ ل سه‌ر ژیانا خه‌كى نه‌بیت، لێ ئه‌وێ ل ڤان داویان ئاشكه‌را بووى و حه‌یده‌ر عه‌بادى بخوه گۆتى كو هنده‌ك پارتێن سیاسى ل هه‌رێمێ ژ وى خواستینه مووچه‌یێ فه‌رمانبه‌ران ره‌وانه نه‌كه‌ت، ئه‌و بوو ئه‌گه‌ر ئه‌و ئینتیمایا خه‌لكێ كوردستانێ ل ده‌مێ ریفراندۆمێ بۆ كوردستانا وى دروست بووى؛ لاواز ببیت، لێ ئه‌ڤه هه‌موو نه‌شیان ل هه‌مبه‌ر به‌رگریكرن ژ مافێ خه‌لكێ كوردستانێ و بزاڤێن حكومه‌تا هه‌رێمێ رێگربن، له‌ورا ئه‌وا نها دناڤبه‌را به‌غدا و هه‌رێمێ دهێته دیتن ژ سیاسه‌تا وێ حكومه‌تێ یه ئه‌وا ل ده‌مێ به‌رفره‌هیێ و هه‌بوونێ؛ گه‌له‌ك خوه‌دان هه‌بوون و گۆران و كۆمه‌ل و ئێكگرتوو چه‌پ و راست ژێ دخوارن، لێ ده‌مێ نه‌بوونا بۆدجه‌ى و كێمبوونا داهاتى و گیروبوونا مووچه‌ى، ئیدى پاریێ گه‌ریێ وان دناڤا حكومه‌تێ دا نه‌ما و وه‌زیرێن خوه ژێ ڤه‌كێشان، ئه‌ڤه بخوه ره‌ڤینه ژ به‌رپرسیاریێ؛ ده‌ما ئاستێ قه‌یرانێ رۆژ بۆ رۆژێ دژوار ببیت، پارته‌كا سیاسى خوه ژ به‌رپرسیاریێ ڤه‌كێشیت و ئالایێ سپى بلند بكه‌ت و بێژیت: مه شیانا چاره‌كرنێ نینه
و ده‌مێ هه‌ر ژ وێ حكومه‌تێ داخواز بكه‌ت كێشه‌یان بكه‌ت، وى ده‌مى (عوزر) ژ (قه‌باحه‌تێ) مه‌زنتر دبیت و تاراده‌یكێ دبیته نوكته ژى، لێ پارتى و قولاچكه‌كێ ئیكه‌تى مان و بزاڤكرن، ئه‌وێ ب چاره‌سه‌رێ ڤێ قه‌یرانێ و خوه‌شكرنا په‌یوه‌ندیێن ناڤبه‌را هه‌ولێر و به‌غدایێ دهێته‌ن دانان، نێچیرڤان بارزانى سه‌رۆكێ جڤاتا وه‌زیرێن هه‌رێمێ یه، مژارێ چاره‌كرنا كێشه‌یان ب چ ئاوایه‌كى بیت گرنگ نینه، گرنگ ئه‌وه ئه‌نجامێ رێكه‌فتنێ د به‌رژوه‌ندا مووچه‌خۆر و خه‌لكێ كوردستانێ یه، له‌روا هه‌بوونا هنده‌ك فه‌رمانبه‌رێن حكومه‌تا فیدرال دناڤا فرۆكخانه‌یان هیچ ژ بهایێ رێكه‌فتنێ كێم ناكه‌ت و هه‌تا كو ب پراكتیك خه‌لكێ هه‌رێمێ مووچه‌یێن خوه وه‌ردگریت ژنوو دێ هه‌ست ب وێ یه‌كێ كه‌ت، بزاڤێن سه‌رۆكێ حكومه‌تا هه‌رێمێ بۆ چاره‌كرنا كێشه‌یان هه‌ولێر و به‌غدایێ ب پله ئێك وه‌لاتیێن هه‌رێمێ ژێ مفادارن، ئیدى خه‌لك ژى دێ گه‌هن وێ باوه‌ریێ كو ئه‌و پارتێن سیاسیێ هه‌رێمێ وه‌كو گۆران و كۆمه‌ل و پشكه‌كا ئێكه‌تیێ و ههڤپهیمانى و شاسوارى ده‌ما پشتى 16ى ئكتۆبه‌رێ سه‌ره‌دانا به‌غدایێ كرن و ژ عه‌بادى خواستن مووچه‌یێ خه‌لكێ هه‌رێمێ نه‌هنێرێت؛ نه‌شیان ب سه‌ر بزاڤێن سه‌رۆكێ حكومه‌تا هه‌رێمێ سه‌ركه‌ڤن و ببنه رێگر ل هه‌مبه‌ر چاره‌كرنا كێشه‌یان، بێگومان ئه‌و ره‌وشا نها دناڤبه‌را هه‌ولێر و به‌غدایێ چێبووى و په‌یوه‌ندی به‌ره‌ف باشیێ دچن، نووچه‌یه‌كێ گه‌له‌ك نه‌خوه‌شه ژى بۆ وان پارتێن ل سه‌رى من باسكرین
