ل گه‌ل روودانێن 16ى ئوكتۆبه‌رێ و هه‌تا نوكه به‌غدا په‌نا بریه به‌ر تۆندۆتیژیێ ل هه‌مبه‌ر كوردان ب هه‌ر رێیه‌كا هه‌بیت و عیراقێ ژى چو بزاڤێن راست بۆ ڤێ مه‌ره‌مێ نه‌هاڤێتینه و ب تنێ خۆشخۆشكن. عه‌بادى هه‌مان ره‌فتارا سه‌رۆكێ به‌رى خوه دكه‌ت. چو بنیاته‌ك بۆ چاره‌كرنا پرسگرێكان نه‌دانایه، د سه‌ر هندێ را ل سه‌ر ده‌سپێشخه‌ریێن هه‌رێما كوردستانێ ژى بۆ دانوستاندنێ رازى نه‌بوویه.
ئه‌و دخوازیت ب مه‌رج دانوستاندن هه‌بن، زێده‌بارى بن پێكرنا دستوورى و مافێن مرۆڤى و بجهـ نه‌ئینانا ماددێ 140 ژ دستوورێ عیراقێ بۆ ئێكلاكرنا چاره‌نڤیسێ ده‌ڤه‌رێن كوردستانى یێن ده‌رڤه‌ى ئیدارا هه‌رێما كوردستانێ. ژبلى ئه‌ڤان ژى رێ ب ده‌ستێوه‌ردانێن ده‌ره‌كى ژى دایه كو مایتێكرنێ د وه‌لاتیێن كوردستانێ دا بكه‌ت وه‌كو عیراق و دڤێت هه‌ژمونا ئیرانێ و میلیشیاتێن حه‌شه‌دا شیعى ل دژى تاكێن كورد بكار بینیت چو ب رێیا خرابكرنا خانوویێن كوردان یان ژى ئه‌شكه‌نجه و ئاوه‌راكرنا وه‌لاتیان.
ژ ڤان ژى خرابتر نه‌حه‌قیا به‌رامبه‌ر وه‌لاتیێن كوردستانێ ژ نه‌هنارتنا مۆچه و بۆدجا هه‌رێما كوردستانێ ب ره‌نگه‌كێ به‌رده‌وام و په‌نا بریه به‌ر دایخستنا فرۆكخانه‌یێن هه‌رێما كوردستانێ ژى. د ده‌مه‌كى دا كو كوردستان بزاڤێن جدى ژبوو دیالوكێ دكه‌ت دا كو ئه‌و كێشه بهێنه چاره‌كرن. سه‌ره‌دانا نێچیرڤان بارزانى بۆ فره‌نسا ژى ئێك ژ وان بزاڤان بوویه. نوكه فره‌نسا وه‌كو هێزه‌كا مه‌زن یا ئورۆپى و خودان پێگه‌هـ ل سه‌ر ئاستێ ده‌ڤه‌رێ دهێته دیتن. سه‌رۆكێ حوكمه‌تێ ژى دڤێت د ڤى چارچۆڤه‌ى دا مفایى بگه‌هینیت و پشته‌ڤانى و گره‌نتیا نێڤده‌وله‌تى ب ده‌ست خوه ڤه بینیت ب تایبه‌ت كو لایه‌نه‌ك وه‌كو لایێ سیێ ناڤه‌ندگێریێ بۆ دروستكرنا باوه‌ریێ د ناڤبه‌را هه‌رێم و به‌غدا دا بكه‌ت. وه‌كو دبینین حوكمه‌تا عیراقێ به‌روڤاژى حوكمه‌تا هه‌رێما كوردستانێ نوونه‌راتیا هه‌موو عیراقیان ناكه‌ت، به‌لكو وه‌لاتیێن كورد وه‌كو عیراقى نابینیت و گه‌له‌ك ژ مافێن وان بن پێ دكه‌ت. هه‌تا ئاسایش و ئارامى و ئێمناهیا عیراقیان یا پاراستى بیت پێدڤیه دانپێدان ب مافێن كوردان بهێته كرن.
باوه‌رم بارزانى یێ ئاماده‌یه بۆ ڤێ مه‌ره‌مێ هه‌ر رێیه‌كا هه‌بیت بگریته به‌ر. حوكمه‌تا هه‌رێما كوردستانێ ب سه‌رۆكاتیا نێچیرڤان بارزانى وه‌كو سه‌ركرده‌كى هه‌رده‌م ته‌كست ل سه‌ر چاره‌كرنا هه‌موو كێشێن ناڤخۆیى ل گه‌ل عیراقێ دكه‌ت و دخوازیت ل گه‌ل وه‌لاتێن هه‌ڤسۆ ژى هه‌موو كێشه ب رێیا دیالۆك و لێكتێگه‌هشتنێ بهێنه چاره‌كرن، هه‌موو رێكارێن له‌شكرى و چه‌كدارى ژى ره‌تكرینه.
بارزانى دبینیت كو شه‌ر وێرانكاریێ ب دووڤ خوه دا دئینیت و تێدا چو لایه‌نه‌ك مفایى ژێ نابینیت، ته‌كست ل سه‌ر وێ ئێكێ كریه كو دڤێت خه‌لك ب ئازادى و خوه‌شگۆزه‌رانى بژیت. ئه‌ڤه ئێك ژ پێنگاڤێن چاكسازیێن حوكمه‌تا هه‌رێما كوردستانێ نه ب سه‌رۆكاتیا نێچیرڤان بارزانى.
