سەرۆكایەتی هەرێمی كوردستان راگەیەنراوێك سەبارەت بە رووداوەكەی دوێنێی پارێزگای دهۆك بڵاو كردەوە كە تێیدا تاوانبارێك لە كاتی بەڕێوەچوونی مەڕاسیمەكانی جەژنی ئەكیتۆ هێرشی كردبووە سەر هاووڵاتییان، لە راگەیەنراوەكەدا جەخت لەوە كراوەتەوە كە لە نزیكەوە بەدواداچوون بۆ رووداوەكە دەكەن و تاوانكاریش بە سزای یاسایی خۆی دەگات.
سەرۆكایەتی هەرێمی كوردستان لە راگەیەنراوەكەدا رایگەیاند "له نزيكه‌وه له‌گه‌ڵ ده‌زگا په‌يوه‌نديداره‌كانى هه‌رێمى كوردستاندا به‌دواداچوون بۆ ئه‌و هێرشه تاوانكارييه ده‌كەین كه دوێنێ له ڕووداوێكى نامۆدا له دهۆك، كۆمه‌ڵێك له جه‌ژنگێڕانى ئه‌كيتۆ له هاووڵاتييانى مه‌سيحيمان تيايدا به ئامانج گيران و بووه هۆى برينداربوونى دوو كه‌س".
راشیگەیاند "له كاتێكدا به توندى ئه‌و تاوانه سه‌ركۆنه ده‌كه‌ين، هه‌موو كوردستانييان دڵنيا ده‌كه‌ينه‌وه كه هه‌رێمى كوردستان وه‌ك هه‌ميشه به نیشتمانی پێكه‌وه‌ژيان و ئارامى و سه‌قامگيرى بۆ هه‌موو پێكهاته‌كانى ده‌مێنێته‌وه و به هیچ شێوه‌يه‌ك ڕێگه به تێكدانى كولتوورى پێكه‌وه‌ژيان و يه‌كترقبووڵكردن و لێبورده‌يى نادرێت".
سەرۆكایەتی هەرێمی كوردستان لە راگەیەنراوەكەدا جەختیشی كردەوە كە تاوانكار به سزاى ياساييى خۆى ده‌گات.
لە رووداوەكەدا دوو كەس بریندار بوون كە ئەوانیش ئافرەتێكی تەمەن 65 ساڵ و گەنجێكی تەمەن 25 ساڵ بوون، بارودۆخی تەندروستی هەردوو بریندارەكە باشە و مەترسی لەسەر ژیانیان نییە.
لە كۆنگرەیەكی رۆژنامەوانیدا عەلی تەتەر پارێزگاری دهۆك ئاماژەی بەوە دا كە تاوانبارەكە لە شوێنی رووداوەكە لەلایەن هێزە ئەمنییەكانەوە دەستگیركراوە و لێكۆڵینەوەی لەگەڵ دەكرێت، راشیگەیاند كە دواتر ئەنجامی لێكۆڵینەوەكان بۆ رای گشتی بڵاو دەكرێتەوە.
کۆمێنت (0)
تا ئێستا هیچ کۆمێنتێک نەکراوە.