هه‌ڤپه‌یڤین- كامه‌ران حاجی ئه‌لیاس
هونه‌رمه‌ندی گۆرانیبێژ عزه‌دین محه‌مه‌د سمایل ناسراو به( عزه‌دین شاهۆیی)، له 1970-6-1 له گوندی ئیلنجاغی بچووكی ناوچه‌ی قوشته‌په‌ی شاری هه‌ولێر له‌دایك بووه.
ئاشنابوونی به هونه‌ری گۆرانی بۆ سه‌رده‌می منداڵی و سه‌رده‌می هه‌رزه‌كاری ده‌گه‌ڕێته‌وه، له ڕێگای ئێزگه‌ی كوردی به‌غدا گوێی له گۆرانییه كوردییه‌كانی ده‌گرت هه‌رچه‌نده، زۆر جار ڕێگری هه‌بوو له بنه‌ماڵه‌كه‌ی و كاریگه‌ری كه‌لتووری هۆكارێك بوون بۆ كاره‌كانی.
گۆرانیبێژ شاهۆیی له ساڵی 2019 كۆمه‌ڵێك گۆرانی له‌گه‌ڵ چه‌ند هاوڕێیه‌كی تۆمار ده‌كات و دواتر له تۆڕی كۆمه‌ڵاتیه‌تی فیس بووك بڵاوی ده‌كاته‌وه و ئه‌وه بوو ده‌نگدانه‌وه‌یه‌كی باشی په‌یداكرد، دوای ئه‌و ده‌نگدانه‌وه‌یه چه‌ندین به‌رنامه‌ی ته‌له‌فزیۆنی و ڕادیۆیی له‌گه‌ڵی سازكرا.
شاهۆیی زیاتر كاری له‌سه‌ر به‌رهه‌مه فۆلكۆرییه‌كان كردووه كه هه‌وڵیداوه زیاتر ئیش له‌سه‌ر ئه‌و ئاوازه فۆڵكلۆرییانه بكات كه ساڵانێكی دوور ودرێژه فه‌رامۆش كراون و دووباره تۆماری كردووه‌ته‌وه به‌ڵام به میوزیكی باشتر و به ده‌نگێكی نوێ به‌گوێی گوێگرانی ئاشنا كرد ئێمه وه‌كو ماڵپه‌ری كوردستان تیڤی له‌نزیكه‌وه به چه‌ند پرسیارێك ئه‌م هونه‌رمه‌نده‌مان به‌سه‌ركردووه.
* سه‌ره‌تا بابزانین چۆن ئاشنای هونه‌ری گۆرانی وتن بوویت؟
- ئاشنابوونم به هونه‌ری گۆرانی بۆ ئه‌و سه‌رده‌مه ده‌گه‌ڕێته‌وه كه له منداڵی و سه‌رده‌می هه‌رزه‌كاری له ڕێگای ئێزگه‌ی كوردی به‌غدا گوێم له گۆرانیه كوردیه‌كان ده‌بوو له‌و ته‌مه‌نه‌وه هۆگر و گوێگری ئه‌و هونه‌ره بووم،به‌هۆی بوونی به‌هره‌ی ده‌نگ خۆشیم تێكه‌ڵ به ئاوازو گۆرانی بووم.
*كامه‌ن ئه‌و گۆرانیبێژانه‌ی كاریگه‌ریان له سه‌رتۆدا هه‌بووه،یاخود به‌ده‌نگیان سه‌رسامیت؟
- گه‌وره هونه‌رمه‌ندانی كورد زۆرن كه كاریگه‌ریان له‌سه‌ر من هه‌بووه، به‌ڵام ده‌نگی چه‌ند هونه‌رمه‌ندێك جیاوازتر ده‌هاتنه به‌رگوێم وه‌كو مامۆستایان حه‌سه‌ن زیره‌ك ، ماملێ ، محه‌مه‌د عارف جه‌زیری، عه‌زیز شارۆخ ، كاوێس ئاغا...هتد به‌رهه‌مه‌كانیان بوون به‌هه‌وێنی به‌هره‌یی هونه‌ریم.
* له‌سه‌رچ بنه‌مایه‌ك تێكستی گۆرانییه‌كانت هه‌ڵده‌بژێریت؟
- ئه‌و گۆرانیانه‌ی تایبه‌تن به خودی خۆم هه‌وڵم داوه ئه‌و هۆنراوانه هه‌ڵبژێرم كه زیاتر له‌گه‌ڵ سروشت و كه‌سایه‌تی من گونجاو بێت له هه‌مان كاتدا گرنگه هۆنراوه‌كان گوزارشت له‌ڕه‌سه‌نایه‌تی كوردی بكه‌ن.
* تا چه‌ند كلیپكردن بۆ گۆرانیبژ گرنگه ، ئاستی كلیپی گۆرانییه كوردییه‌كان چۆن ده‌بینی؟
- بێگومان كلیپ كردن بۆ كاره هونه‌رییه‌كانی هه‌ر هونه‌رمه‌ندێك بۆ به‌ره‌و پێشچوونییه‌تی له بواره‌كه‌دا گرنگه به‌ڵام زۆر جاریش گوزه‌ران و باری دارایی كه‌سه‌كه ده‌بێته ئاسته‌نگ له‌به‌رده‌م كاره هونه‌رییه‌كان، بۆیه كلیپ به گرنگ ده‌زانم، ئاستی كلیپی گۆرانییه كوردییه‌كان باشن به‌ڵام مانای ئه‌وه نییه هه‌موو كلیپه‌كانیش باش بن.
* به‌رێزتان زیاتر له تۆڕه‌كۆمه‌ڵاتییه‌كان به‌رهه‌مه‌كانت بڵاوده‌كه‌نه‌وه، كه‌متر له تیڤییه‌كان ده‌رده‌كه‌ون هۆكاره‌كه‌ی بۆ چی ده‌گه‌رێته‌وه؟
-له‌وانه‌یه به‌شێكی ئه‌و وه‌ڵامه لای كه‌ناڵه‌كان بێت، به‌شه‌كه‌ی تر بۆ ئه‌وه ده‌گه‌ڕێته‌وه بۆ ئه‌و شێوازه كلیپ كردنه‌ی من كه كردوومه بۆ كاره‌كانم و جگه له‌خودی خۆم هیچ كه‌سێكی تر له كلیپه‌كانم نمایش نه‌كراون و ناكرێن بۆنموونه وه‌كو به‌شداری كردنی ئافره‌ت ڕه‌نگه له‌ی زۆرێك له كه‌ناڵه‌كان ئه‌وه مه‌رجی سه‌ره‌كی بێت، به داخه‌وه.
* ئایا مه‌رجه گۆرانیبێژ ژه‌نیار بێت ؟
- به‌ڵێ زۆر گرنگه گۆرانی بێژ ژه‌نیار بێت و سه‌ركه‌وتوانه‌تر ده‌توانێ كاره هونه‌ریه‌كانی باشتر ئه‌نجام بدات، له هه‌مان كاتدا هاوكارێكی باشی ژه‌نیاره‌كان ده‌بێت،چ له كاتی تۆماركردنی گۆرانیه‌كان یاخود له كاتی سازدانی كۆنسێرته‌كان به شێوه‌یه‌كی زیندوو.
* له ئێستادا چه‌ندین فۆرمی گۆرانی هه‌ن بۆنموونه وه‌ك( ڕاپ) چۆن ده‌ڕوانیت ئه‌م شێوازانه به‌تایبه‌تی بۆ نێو كۆمه‌ڵگای كوردی؟
- به‌بۆ چوونی من " ڕاپ" جۆرێكه له‌و شێوازه هونه‌ری كه نامۆیه و جێگای نابێته‌وه له چوار چێوه‌ی مێژووی هونه‌ری ڕه‌سه‌نی كوردی و شتێكی كاتییه به‌ڵام هه‌ندێ له گه‌نجه‌كان حه‌زی لێده‌كه‌ن.
* هیچ به‌رهه‌مێكی نوێت له هه‌گبه‌دایه؟
- به‌ڵێ چه‌ند به‌رهه‌مێكی نوێم له‌به‌ر ده‌سته و كاریان له‌سه‌ر ده‌كه‌م و به‌و هیوام ته‌مه‌ن ڕێگام پێبدات و ئه‌نجامیان بده‌م بیخه‌مه به‌ر گوێی بیسه‌ران.
ناوی هه‌ندێ له گۆرانییه‌كانی هونه‌رمه‌ند عزه‌دین شاهۆیی: گۆرانی "سیله‌ی چاو "هۆنراوه‌ی م. قادری علیخا ئاوازی ناسری كه‌ریمی،گۆرانی "گه‌ڵای ته‌مه‌ن "هۆنراوه‌ی د. ژیلوان تاهیر ئاوازی عزه‌دین شاهۆیی ، گۆرانی" ئاوێنه‌ی ئه‌وین"هونراوه‌ی ؛م. قادری علیخا ئاوازی عزه‌دین شاهۆیی ،گۆرانی" له یادمی" هۆنراوه‌و ئاوازی كه‌مال یابه، گۆرانی "شه‌وی تاریك" هۆنراوه‌ی حوسێن شریف په‌ناهی ئاواز و وتنی عزه‌دین شاهۆیی ،گۆرانی "په‌ری شیعر" هۆنراوه‌ی حوسێن شه‌ریف په‌ناهی ئاواز و وتنی عزه‌دین شاهۆیی.
کۆمێنت (0)
تا ئێستا هیچ کۆمێنتێک نەکراوە.