Serokê herêmê li gel balyozê Norvêjê civiya

Behsa gelek mijaran bi taybetî hilbijartinên herêmê hatiye kirin.

Îro li Hewlêrê Serokê herêma Kurdistanê Nêçîrvan Barzanî pêşwaziya balyozê Norvêjê yê li Urdin û Îraqê Espen Lindback kir.

Di civînê de têkiliyên Norvêjê yên li gel Îraq û herêma Kurdistanê, giftûgoyên navbera Hewlêr û Bexdayê bo çareser kirina kêşeyên heyî, rewşa siyasî û ewlekarî ya Îraq û herêma Kurdistanê, hilbijartinên herêma Kurdistanê û rewşa Şingalê hatine nirxandin.

Her du aliyan tekez li ser pêşde birina têkiliyan û hevkarî û hevbeşiya navbera xwe bi taybetî di wan waran de kiriye ku, Îraq û herêma Kurdistanê dikarin fêde ji ezmûn û pisportiya Norvêjê werbigirin.

Her di heman civînê de her du alî li ser girîngiya parastina aramî û ewlekariya Îraqê hemfikir bûn û balyozê Norvêjê jî ev yek dubare kiriye ku, welatê wî girîngî dide têkiliyên xwe yên li gel Îraq û herêma Kurdistanê.

Şer û aloziyên Rojhilata Navîn û bandorê wan, şerê Ukrayna û çend mijarên din yên cîhê girîgniya hevbeş mijarên din yên vê civînê bûn.