Amerîka huşdarî dide Tirkiyeyê

Rûsye jî dibêje me li gel Tirkiyeyê rêkeftin îmze kiriye.

Piştî ku ajansa pîşesaziya berevanî ya Rûsyeyê ragihand ku, di navbera Rûsye û Tirkiyeyê de rêkeftineke nû bo şandina karwana duyem ya sîstema berevaniya mûşekî ya S400 û çê kirina hin parçeyên vê sîstemê bi hevbeşî li gel Tirkiyeyê, hatiye îmzekirin, Amerîka huşdarî daye Tirkiyeyê.

Her çend Tirkiye ev daxuyaniya Rûsyeyê red kiriye, lê Amerîka dibêje NATO û welatên din y ên Rojavayî vê yekê qebûl nakin ku, Tirkiye hem endamê NATO be û him jî çekên Rûsî bikar bîne.

Peyvdarê wezareta derve ya Amerîkayê Ned Price di daxuyaniya xwe ya herî dawî de huşdarî daye Enqere û gotiye hîn jî kêşeya karwana yekem ya S400an nehatiye çareser kirin, lewre eger Tirkiye rêkeftineke wisa li gel Rûsyeyê îmze bike vê demê helwesta Amerîka û welatên Rojavayê ya li hember Tirkiyeyê dijwartir dibe û lazime Tirkiye xwe ji Rûsyeyê dûr bixe.

Her duhê hin rojnameyên navdar yên Rojavayî jî belav kiribûn ku welatên Rojavayê ji nêzîk bûna Rûsye û Tirkiyeyê dilgiranin û dest bi amadekarî bo raber kirina helwesteke dijwar li hember Tirkiyeyê kirine.

Weke tê zanîn ji sala 2017an ve heta niha kêşeya sîstema berevaniya mûşekî ya S400 di  navbera Tirkiye û Amerîkayê de bêçareser maye û Amerîka jiber vê yekê jî dorpêç danîbû ser Tirkiyeyê.