Ebadî serdana Tirkiyeyê dike

Serokwezîrê Iraqê Heyder Ebadî di axaftina xwe ya civîna çapemenî ya heftane de ragihand ku di demeke nêzîk de wê serdana Îran û Tirkiyê bike.

Serokwezîrê Iraqê Heyder Ebadî di axaftina xwe ya civîna çapemenî ya heftane de ragihand ku di demeke nêzîk de ji bo nirxandina rewşa herêmê wê serdana Îran û Tirkiyeyê bike. Ebadî got: "Iraq li herêmê aktorekî bi bandor û girîng e û dixwaze bi hemû cîranên xwe re di nava têkiliyê de be."

Ebadî di berdewamiya axaftina xwe de ji bo têkiliyên Iraq û Siûdiyê got: "Divê xelkê Iraq û Erebistana Siûdî nêzîkatiya navbera herdu welatan bibînin."

Herwiha Fermandarê Operasyonên Bexdayê Celîl el-Erebî jî di civîna çapemenî de ji bo ewlehiya hilbijartinê got: "Ji bo ewlehiya însan û hemû navendan planeke berfireh dimeşe û roja hilbijartinê wê hemû herêmên Bexdayê ji sedî sed bi ewle bin."

Hêjeyê gotinê ye ku dema qala dîplomasiya Tirkiye, Îran û Iraq ya di nava xwe de tê kirin di destpêkê de hevkarî û palan her sê welatan a li dijî kurdan tên rojevê. Gelek analîst hê ji niha ve diyar dikin ku ev serdan jî armanca xwe ya veşartî ristina hevkariya hersê welatan ya li dijî kurdan e.